Guwahati, Naitung 24: Ka sorkar kmie kan phah ia ka kynhun jong ki myntri sorkar sha Assam hapoh ki katto katne sngi ban bishar bniah ia ka jingjulor kaba jur na ka jingshlei um kaba la pynjot ia ka jylla bad ban ai jingmut ia ka jingiarap pisa, la pynthikna u Union Home Minister u Amit Shah ia u myntri rangbah ka jylla u Himanta Biswa Sarma.
Kane ka jingpynthikna ka la wan ha ka por ba ka Assam ka dang ïakhun pyrshah ïa kawei na ki jingjia shlei um kaba shyrkhei tam ha kine ki snem ba la dep, ha kaba palat 6.43 lak ngut ki briew ki la shah ktah ha kylleng ki 10 tylli ki distrik, 47 ngut ki la duh la ka jingim, bad 70 haduh 80 ngut ki briew la ïathuh ba ki dang jah, kaba la wanrah ïa ka jingtieng ba ka jingïap ka lah ban kiew shuh shuh.
Ha ka jingthoh ha ka X, u Sarma u la ong ba u Shah u la phone ia u ban iakren ia ka “jinglong jingman jong ka jingshlei um kaba khlem” bad u la pyntip ia u ba ka kynhun jong ki myntri sorkar pdeng kan sa wan jngoh shen ia ka jylla.
“U Myntri ka tnad kam Pohïing u Amit Shah u la pyntip ïa nga ba ka kynhun jong ki myntri ka sorkar pdeng kin sa wan shen sha ka jylla ban bishar bniah ïa ka jingjulor bad ban ïarap ban tip ïa ka jingïarap na ka bynta ban tei pat ïa ki lad kamai kajih,” la thoh u Myntri Rangbah ka Jylla.
Hadien kata, haba leit jngoh ïa kawei ka jaka ai jingiarap ha Komarbondha ha Golaghat district, u Sarma u la ïathuh ha ki nongthoh khubor ba la khmih lynti ba ki ophisar na ki tnad bapher bapher jong ka sorkar pdeng kin poi sha Assam “mynta ka sngi ne lashai” ban sdang ïa ka jingkhmih bniah.
Haba pynpaw ïa ka jingsngewnguh ïa u Union Home Minister, u Sarma u la pynpaw biang ba kane ka jingjia ka la mih na ka jingther u slap ba jur ha ka jylla Nagaland, kaba la pynlong ruh ïa ka um kaba bun bha ban tuid sha ka wah Dhansiri bad kaba la pynshlei ïa ki bynta kiba heh jong ka Upper Assam.
Ha kawei pat ka jingthoh ha ka X, u Myntri Rangbah ka Jylla u la ong ba ka jingheh jong ka jingshah pynjulor ka long kaba ym pat ju jia mynno mynno ruh, da kaba kdew ba ki jingther jong u slap sharum wah ryngkat bad kaba long 436 percent palat ïa kaba ju long ka la pynngam jyllop ïa ki shnong ki bym pat ju mad ïa kum kane ka jingshlei um ha ka histori.
Katba ki kam ai jingïarap ki dang ïaid shakhmat, ka sorkar jylla ka la bthah ïa baroh ki District Commissioner ba kin pynthikna ïa ka jingpynpoi khlem jingthut ïa ki sanitary napkin bad ki jingbam khyllung ha ki jaka ai jingïarap, ki jaka sah ba shipor bad ki relief distribution centres.La bthah ia ki heh ophisar ban pynneh ia ki stock kiba biang bad ban pynthikna ia ka jingsam ha ka por kaba biang ban iada ia ka koit ka khiah, ka jingkhuid jingsuba bad ka jingdonkam bam jong ki kynthei, ki khynnah kynthei kiba dang rit, ki khyllung bad ki khynnah rit.
Ka bor pyniaid district ka jylla ka dang bteng ïa ki kam pynlait im bad ai jingïarap wat haba ka um ka dang heh bha ha ki katto katne ki distrik, ha kaba da ki hajar tylli ki longïing kiba la shah pynkynriah ki dang sahkut ha ki jaka ai jingïarap.
