Shillong, Naitung 24 : U Symbud Myntri Rangbah bad National Vice President ka NPP Bah Sniawbhalang Dhar ha ka sngi Thohdieng, ula ong ba ka party kan sar ha ka jingioh vote ha baroh ki san tylli ki Assembly constituency ka Ri-Bhoi district ha ka elekshoh shiteng samoi ban wan jong ka Shillong Lok Sabha, haba kdew ruh ia ka jingnang jur ka jingkyrshan ia ka NPP ha kylleng ka ri-lum Khasi bad Jaintia.
Haba kren ha ka rynsan ialap elekshon ha Patharkhmah na ka bynta u kyrtong ka NPP Dr DRL Nonglait, u Bah Sniawbha ula ong ba ka jingwan tuid ki paidbah nongthep vote sha ki jingialang ki pyni ba ka khubor jong ka party kala poi bad sawa ha ka Jylla barohh kawei.
“Ha ri-lum Jaintia ngi la ioh lypa ia ka jingkyrshan ba pura. Ha Ri-Bhoi ngin sa tam ha baroh san tylli ki constituency. Leit sha West Khasi Hills-ym donkam hi ruh ban iakren- ngin jop don burom bha. Wat ha East Khasi Hills ruh ngi la nang kiew na ka sngi sha ka sngi” ong u Bah Sniawbha.
Ula ai burom ia kane ka jingnang wan kyrshan ki paidbah sha ka jinglah ban treikam bha jong ka Sorkar MDA ba ialam da ka NPP.
“Ki paidbah kila iohi ba ka Sorkar NPP ka dei kaba treikam bad kren duna. Mynta, ki stad ki jhad bad ki nongshongshnong ki sngewthuh ba, ban pyniaid ia ka Sorkar phi donkam ia ka party kaba sngewthuh, ym ki party kiba heh tang ka tyngam” ula ong.
U Bah Sniawbha ula iaroh ia u Dr Nonglait, u Professor ka NEHU ba don bun ki degree, kum u kyrtong uba don ia ka kyrdan pule bad uba shemphang ha ka jingtreikam bad ki paidbah.
“Ka rai ban pynieng ia u Dr Nonglait kam dei kaba la shim tang ka party marwei. Ngi la iakren ia ki nongialam na baroh 36 tylli ki constityency bad ngi la kren da kawei ka sur. Baroh ki ia mynjur ba u dei u briew uba biang eh ban mihkhmat ia ka ri-lum Khasi bad Jaintia bad ka Meghalaya ha Parliament” bynrap u Bah Sniawbha.
Haba kyntu ia ki nongthep vote ban iamih shimbynta ha ka elekshon shiteng samoi, kaba lah ban long ha u bnai Risaw lane Naiwieng, u bah Sniawbha ula kyntu ia ki nongkyrshan ba kin ai ia ka vote jong ki ha ka shap jong ka kot.
U Bah Sniawbha ula iaroh ruh ia u MLA ka Jirang Bah Sosthenes Sohtun namar ka jingwanrah ia ki jingtei bapher bapher hapoh ka constituency, haba pynpaw ba jan 95% ki surok ha Jirang ki dei kiba la dep pyntrei bha bad ka thain kan sa paw bha ha ka bynta ban wan jong ka PMGSY, kaba la khmih lynti ban mih ha u bnai Nailar-Risaw.
