Dibrugarh, Lber 17: Ka kynhun ki Pulit ba 25 ngut jong ka Punjab ki la don ha jylla Assam, Dibrugarh ha kine ki ar sngi ba la leit, kum shi bynta ban iarap ha ka ban pynkynriah ia saw ngut ki nongïarap u Nongialam ka Khalistan Amritpal Singh na Dibrugarh Central Jail sha Punjab.
Kane ka kynhun ka kynthup ia ki heh ophisar, naduh u Additional Superintendent of Punjab Police bad u Deputy Superintendent of Punjab Police bad ia kane la ïalam da u Superintendent of Police (SP) u Harinder Singh Gill.
Ka tarik ba thikna ban pynkynriah ïa kine ym pat pynpaw paidbah, hynrei ka kynhun ki Pulit ka Punjab ki la trei shitom ban pyndep ïa ki jingdonkam katkum ka aiñ ha Dibrugarh shwa ban ïaid shakhmat ban pynkynriah ia kine ki briew.
Kine ki koidi kiban pynkynriah ki kynthup ïa u Daljit Singh Kalsi, u Kulwant Singh Dhaliwal, u Gurmeet Singh Bukkanwala, u Harjit Singh bad ka jingthmu ban pynkynriah ia ki sha ka phatok ha Punjab la khmih lynti ba urlong hapoh kine ki ar ne lai sngi ban wan.
Katba u Amritpal Singh, ha ryngkat u Papalpreet Singh bad u Varinder Singh Johal, kin dang bteng ban shah set hapoh ka NSA, bad ka jingshah set phatok jong ki, kan kut noh ha u bnai Jylliew 2025.
