Guwahati, Nailur 1: U Myntri Rangbah ka Assam Himanta Biswa Sarma ha ka sngi Palei u la nang pynjur ka jingkynthoh pyrshah ia u MP ka Congress u Gaurav Gogoi, kaba la ai ia ki dak ki shin ban pynshisha halor ka jingkynnoh donkti jong u Gogoi bad u wei u nong Pakistan lah ban aiti noh sha ka kynhun tohkit CBI ne NIA hadien ka 10 tarik u Nailur.
Kuma long mynta, ka kynhun Special Investigation Team (SIT) ka dang eksamin ia kane ka jingsuba don jingiadei bad u nong Pakistan u Ali Tauqeer Sheikh bad ka lok jong u Gogoi ka Elizabeth Colburn Gogoi. U Sarma u la kynnoh ba ka Colburn ka don jingiadei bad u Sheikh, da kaba maham ba katei ka mat ka buh jingma ia ka jingshngain ka ri.
“Ka SIT jong ka Assam ka don u pud ban ioh ia ki jingtip- ngi lah ban ioh tang ka jingiakren phone ha kine ki ar snem ba la leit.Ka NIA, ka lah ban leit biang shaduh u snem 2011. Namar ba kane ka iahap ne don jingiadei bad ka jinglong nong shong shnong bad ka OIC, ka Ministry of Home Affairs ka hap ban shimti,” ong u Sarma.
Shuh shuh u la pyntikna ba ka jingtrei kam jong ka SIT kan kut noh ha 10 tarik u bnai Nailur bad ia report la khmih lynti ha ka 11 bad 12 tarik u bnai Nailur. Ka jinglap bad ka jingshem jong ka SIT un sa rah ha ka jingialang ki kynhun myntri hapoh ka 15 tarik u Nailur bad un sa rai ba ia kane ka case yn sa aiti sha ka NIA, CBI, ne MHA.
Haba shim ia ka jingkynthoh ba dang shen jong u Gogoi ha Parliament, u Sarma u la kynnoh ia u ba u la kren ban ioh jingmyntoi ka Pakistan.”
“Na ka jingkren ne ka jingkynthoh jong u, ka paw shai- ba um ieit ia ka ri India.Ka lok jong u kadei ka nongwei (foreign national) bad ki khun jong u kidei ki nongwei bad ngan ym sngewphylla lada u pynkylla noh ia ka jinglong nong shong shnong ha kawei ka sngi,” la kynnoh u Sarma.
Shuh shuh u Sarma u la kynthoh ruh ïa u Gogoi uba la buh jingkylli ïa ki rai pynher namding jong ki shipai, da kaba ong ba ka long “ka jinglehraiñ ba ïa u MP na Assam— uba mihkhmat ïa ki thaiñ ba pawnam kum ka Jorhat bad Sivasagar— mynta la rakhe ïa u ha Pakistan.”
U Sarma u la kam ba ka record u Gogoi hapoh ka Parliament naduh u snem 2014, “Kala paw ba la shna khnang ban iarap ia ka Pakistan,” da kaba kdew ba u “lah ban ym dei u hero ha ki TV jong ka ri India, hynrei u dei ha ki TV jong ka ri Pakistan.”
U Myntri Rangbah u la kynnoh ruh ba u Gogoi um ju “kyntait ba u ju leit jngoh ia ka Pakistan,” kaba ai jingmut ba u MP ka Congress u “sah tang shipor ha India”
Ha kawei ka bynta, u Sarma u la kyrshan ïa ka jingkren u Union Home Minister u Amit Shah ha Parliament, da kaba kynnoh ba ka Congress ka la shna thok ïa ka kyntien “Hindu terror.”
“Ki Hindu bad ka kam lehnoh ki long kiba pyrshah bha. Ka kolshor jong ngi kam ju kyrshan ia ka kam lehnoh. Ia kata ka kyntien la shna ha ka por ba synshar ka Congress ban pynsngewbha ia kawei ka jaitbynriew,” u la ong.
