Dibrugarh, Nailar 01: Ki bor khmih ka tnad Railways kila ioh ban pyllait im ia 26 ngut ki khynnah kynthei bad kawei ka thei samla na ka tyrsim jong ka jingshah khaii met sha Tamil Nadu bad ia kine la ioh ban pyllait na Tinsukia Railway Station ha kaba la shu soi thok ia ki kot ki sla.
Kila don 5 ngut kiba la shah kem halor ka jingsuba ba kila donkti ha ka kam khaii met kiba kynthup ia ki kynthei bad shynrang. Ka Railway Police Force (RPF) bad ka Government Railway Police (GRPF) kila pynlong lang ia ka jingkhynra hapoh kane ka steshon rel.
Uwei na kiba la shah kem u Bidyut Dutta, ula iathuh ha ka jingshah tohkit ba la ialam ia kitei ki kynthei ban leit trei ha karkhana suh jain ha Tamil Nadu, hynrei ki bor khmih ki dang tohkit ia kane ka jingkam bad ki dang trei shitom ban tih ia ka daw tynrai bad ia ka jingshisha baroh ban lap ksai shaphang ka kam khaii met.
Ka jingkhaii met kadei kawei na ki mat kaba ju jia khah khah hapoh ka Upper Assam, khamtam eh ha ki jaka kiba don ki kper slasha, ia kaba ki nongkhaii met ki ju leit ban pynbiej ia ki longiing baduk da ka pisa, hashwa ban shim noh ia ki khun jongki bad hadien kane pat ban ioh die noh ia ki sha kiwei pat ki jylla.
Ka sorkar Assam dang shen kala pynmih ia ka jingpynbna paidbah ia ka polisi treikam ha ka jylla da ka jingthmu ban iakhun pyrshah ia ka jingkhaii met bad ka jingbeh ksuid, da kaba don ia ka thong ban pynlong ia ka imlang sahlang bad ia baroh ki riewshimet kiba lah ban ia im lang ha kajuh ka kyrdan bad kiba lait na kino kino ki jingshah thombor.
Kane ka polisi treikam kadei ruh da ka thong ban ai ia ka jingshngain bad ia ka imlang sahlang kaba mar kumjuh ia baroh, ha kaba ki riewshimet kin lah ban ioh ia ki jingshakri bad kiwei kiwei ki jingmyntoi bad ban im ia ka jingim kaba lait na ka jingiaumsnam bad da kaba iatreilang bad ki tnad bapher bapher.
Kane ka polisi kala pdiang ruh ba ka jingkhaii met bad ka jingbeh ksuid kadei kaba la ktah jur bha ia ki longkmie bad ki khynnah kynthei ia kaba donkam ban tehlakam da ki kyndon ain.
