Shillong, Nailur 1 : Ka Iingkashari Meghalaya High Court kala ong ba ki nongshah mudui ki lah ban ai ia ki jingai jingmut sha ki bor pyniaid District ba kan shim ia ki lad ki lynti ki ban pynthikna ba ka Yatra, kaba la buh ban long la 2 tarik Nailar, kan iaid beit khlem kino kino ki jingjia.
Ka Iingkashari bala khlieh da u Justice HS Thangkhiew kala pynpaw ruh ba kam kwah satia ban pyn mih ia kano kano ka hukum kaba lah ban pyntroin noh ia ka hukum ba kham hashuwa, bala pynmih da ka Iingkashari.
“Naba ia ka Yatra, la pyntip bala buh ha ka 2 tarik Nailar, 2025, kane ka Iingkashari kam kwah ban pynmih shuh shuh ia ka hukum kaba lah ban pyntroin noh ia ki hukum bala dep pynmih da ka IIngkashari. Hynrei, lada ki nongshah mudui ki kwah na ka bynta ka jingshngain, ba ka Yatra kan iaid beit khlem kino kino ki jingjia, ki lah ban ai ia ki jingai jingmut sha ki bor district ba kin pynneh ia ka shongsuk shongsain da kaba shim ia ki lad jingiada kiba donkam” ong ka Iingkashari ha ka hukum ba pynmih ha ka sngi Palei.
La pyntip ruh sha ka Iingkashari ba kala don ka jingpyrshah na ka Shnong ba kyrteng ka Lyngiong haba iadei bad kane ka Yatra.
La bthah ia u nongiasaid ain jong ki nongmudui ba un phah da ka jingthoh sha ka Deputy Commissioner, ka ban sa pynmih ia ki hukum kiba donkam.
Ia kane ka kam la buh ban shong bishar biang ha ka 5 tarik Nailar, 2025.
