Dibrugarh, Jymmang 14: Ki bor district ka Dibrugarh ki la pynmih ïa ka jingbthah kaba pyrkhing bha, kaba khang ban pynmih, shon, pynphriang, sam, die, pyni, bat bad buh ïa kino kino ki kot ki sla, ki tiar lane ki jingthoh digital kiba ïadei bad ki seng kaikhlaw ba la khang pyrshah.
Katkum ka jingpynbna ba la pynmih da ka Ophis jong u District Magistrate, Dibrugarh, la ong ba ïa kane ka hukum la pyntreikam katkum ka kyndon 98 jong ka Bharatiya Nagarik Suraksha Sanhita (BNSS), 2023, ha kaba ïadei bad ka jingpynbna jong ka sorkar kaba la pynmih ha ka 3tarik Nohprah 2025.
U Additional Majistor District u Pranjal Boruah u la pynpaw ba katei ka jingbthah ka kynthup ïa ki tiar ba paw bad ki tiar digital kiba ïadei bad ki seng lehnoh.
Katei ka hukum ka la jer kyrteng kyrpang ia ki sengbhalang kum ka Jamaat-ul-Mujahideen Bangladesh (JMB), Ansarullah Bangla Team (ABT), Ansar-Al-Islam/Pro-AQIS, ryngkat bad kiwei pat ki seng kiba kum kine kiba la shah khang lane kiba iasoh lang.
Ka pynïar ruh sha ki website, ki social media page, ki lad pynïadei ba la buhrieh, ki kynhun online bad kiwei kiwei ki lad digital ba pyndonkam ban pynphriang ïa ki jingthoh ba shyrkhei kiba ïadei bad kum kine ki seng.
Ka jingpyntip, kaba la phah sha u Senior Superintendent of Police, Dibrugarh, ka bthah ia ki bor jong ka ain, ba kin pynthikna ba kin bud pyrkhing bad ban shim ia ki sienjam kiba donkam pyrshah ia ki jingpynkhein ain. La bthah ruh ïa ki bor pulit ban pyntip ïa ki case ba la ithuh bad ïa ki kam ba la leh hadien kata sha ka ophis jong u District Magistrate.
