Guwahati, Lber 8: Ka sain pyrthei hapdeng ki “Miya” ha Assam ka la iaid ha ka lynti kaba thymmai hadien ba u Myntri Rangbah Himanta Biswa Sarma u la buh ia ki shiphew tylli ki kyndon na ka bynta ki jaidbynriew ha shwa ka elekshon sha ka iing dorbar thawain jong u snem 2026.
Kane ka jingjia ka wan hapdeng ka jingkhih phaloh kaba nang jur halor ka jingkren jong u Myntri Rangbah ka Jylla shaphang ka jaidbynriew “Miya”. Dang shen, ka Gauhati High Court ka la ai da ka notice sha u Sarma ha kaba ïadei bad ka PIL (Public Interest Litigation) da kaba kynnoh ba u la pynmih ïa “ki jingkren shun” pyrshah ïa ka imlang sahlang.
“Ngam don kano kano ka jingshun shimet bad ki jaidbynriew Miya katba ki dang kloi ban pyrta ‘Bharat Mata Ki Jai’ bad pule ‘Vande Mataram’ ba pura”, la ong u Myntri Rangbah ka Jylla.
U la bynrap ba ki briew ki dei ban lah ban rwai ia ka jingrwai jong ka ri naduh u lain ba nyngkong haduh ba khatduh, da kaba pynskhem ba kum kine ki dak kin pyni ia ka jingaiti jong ki ia ka ri.
U Sarma u la kdew ruh ïa ki katto katne kiwei pat ki kyndon, da kaba ong ba ka imlang sahlang ka dei ban sangeh noh ïa ki rukom leh kiba u la batai kum ka “love jihad”, “land jihad” bad “fertiliser jihad”.Shuh shuh u la ong ba ka jingshongkha khynnah bad ka jingshongkha bun tnga ka dei ban kut noh lada kwah ban tei ïa ki jingïadei kiba kham bha.
Ka jingkren jong u Myntri Rangbah ka Jylla shaphang ka jaitbynriew “Miya” ka la pynmih ïa ka jingïa kynthoh ba jur ha kine ki bnai ba la dep.
Ha ka 31 tarik Kyllalyngkot, u Sarma u la ong ba ka kyntien “Miya” ka thew ia ki nong Bangladesh kiba wan buhai shnong bad u la byrngem ban beh noh ia ki na Assam. “Ka Miya ka mut ki nongwan rung tuh na Bangladesh, bad ngi la rai ban leh katba lah ban beh krad biang ia uwei pa uwei na ki na Assam”, u la ong haba kren ha ka jingialang paidbah.
Ha ka jingthoh ha ka social media lyngba ka rynsan X ha katei ka juh ka sngi, u Sarma, u la thoh ba un nym pynsangeh ia ka jingialap pyrshah ia ki nongwan buhai shnong wat lada “ki hajar ngut ki Rahul Gandhi kin pyrta”.
U Myntri Rangbah ka Jylla ula pyndonkam bunsien ïa ka kyntien “Miya” haba u kdew ïa ki Muslim kiba kren Bengali ha kane ka jylla, da kaba kynthoh ba ka jingwan buhai shnong na Bangladesh ka wanrah ïa ka jingeh ha ka jingim ki nong Assam.
Da kaba jan ka elekshon sha ka iing dorbar thawain jong u snem 2026, ka jingiapher jingmut ha ka sain pyrthei ha ka jylla ka paw ba ka nang jur.Ka BJP ka la kynnoh ba ka Congress ka kyrshan ïa ki nongwan rung tuh na ka bynta ka “vote-bank politics”.
Ka polisi “pushback” jong ka sorkar BJP pyrshah ïa ki nongwan rung tuh be-aiñ kiba la shah kynnoh ba ki la ïoh jingkyrshan na ki paidbah, ha kaba bun ki kyrshan ïa ki kam jong ka sorkar.
Hynrei ki party ka liang pyrshah ki la kynthoh jur ïa katei ka polisi, da kaba kynnoh ba ki nongshong shnong ba shisha jong ka ri India ki shah pyndik ha ka kyrteng jong ka jingpynshitom.
Ka Congress ka la pynpaw ïa kane ka mat bunsien, watla ka party kaba synshar ka pynskhem ba ki sienjam jong ka ki long ban ïada ïa ka jingmyntoi jong ka Assam ha ka liang ka jingbun briew bad ka saiñ hima sima.
