Shillong, Lber 7 : U Myntri Rangbah ka Jylla Conrad K Sangma ha ka sngi Saitjain, ula plie paidbah ia ka project pynitynnad shnong ne ka Locality Beautification Project jong ka Nehru Ading ha Hawakhana, Tura, haba pynbna ia ki project kam pynroi ba palat T.700 klur kaba la don ha lynti ban pynkylla dur ia ki jingtei bad ki jingdonkam jong ka sor.
Ka project ha Nehru Ading ka dei kaba la pyntrei da ka Nehru Ading Development and Welfare Committee (NADWC) ban pynitynnad ia ki sawdong sawkun bad ki jingtei ba kongsan jong ka Shnong. U Myntri Rangbah ula plier uh ia u mawthoh kyrteng ban pynsah jingkynmaw ia kane ka jingplie ia ka project, ha ka jingialang ba long ha Old Church Campound.
Haba ai jingkren sha ki nongshongshnong bad ki Nongialam Shnong, u Conrad ula ong baka Tura kala sakhi ia ka jingkylla suki suki lyngba ki kam pynroi ba bun jait, watla bun ki kam kiba dang sah ban leh.
“Ki kam pynroi bapher bapher ha ki kyrdan bapher bapher, kiba kot palat T.700 klur lah pyntrei na ka bynta ka roi ka par jong ka sor Tura” ula ong.
Haba kren ia ki project hapoh ka Smart City Mission, u Myntri Rangbah ila ong ba kumba T.60 klur lah ai ban shna ia ki surok shnong ha ki kyntoit bapher bapher. Nalor kane, T.15 klur lah dep ban pynlut ha ka wat ba nyngkong na ka bynta ki street lightbad ki kam pynitynnad jaka, katba sa T.15 klur lah dep ban mang ban pynitynnad ia ka iew Tura.
Ula kren ruh halor ki jingpynitynnad ia ki jaka sor da ka jingmut ban pynjanai ia ki jingtrei ha Sor bad ka jingshngain u paidbah. Kum shibynta na kane ka sienjam, kumba 350 tylli ki CCTV camera bad 500 tylli I street light lah dep ban pyndait ha kylleng ka sor Tura.
U Myntri Rangbah ula kyntu ruh ia ki nongshongshnong ba kin trei shitrhem ha kaban pynneh ia ka jinglehkhuid lehsuba ki nongshongshnong, haba ban jur ba ka jingiashimbynta lang u paidbah ka long kongsan bha na ka bynta ki kam pynroi ki ban iai neh.
Ha ka jingiakren, ki nongshongshnong kila pynsngew ia shibun ki jingeh kynthup ia ka jingdonkam ia ka Community Hall, ka jingshna ia ka kynroh ha Hawakhana Govt LP School, ka jingmaramot ia ka Iingskul bad ka jingpynpoi um sha ki skul SSA ka thain bad kiwei kiwie.
