South Salmara, Jymmang 27: Ka jingkulmar ka la kyan haki thain khappud India-Bangladesh jong ka South Salmara-Mankachar District ka Jylla Assam hadien ba katto katne ngut ki briew ba suba nong Bangladesh ki la shah pynphai biang ha ki bor synshar ka India haka miet 26 tarik Jymmang.
Kane ka jingjia kala pynmih iaka jingpyrshah kaba jur na ki trai shnong ka Bangladesh bad ki shipai Border Guards Bangladesh (BGB), kaba la pynlong ïa kane ka kynhun ban sahkut hajan u pud u sam ka India-Bangladesh.
Ki video kiba la saphriang ha ki rynsan social media ki pyni ba kumba 14 ngut ki briew ki ieng hajan zero line hajan ka jingker sainar shah ha khappud kaba la pynmih ïa ki jingsngewkhia halor ka jingshah lehbeiñ jong ki nongwan buhai shnong khlem kot don sla ha kane ka thaiñ.
Ki tyllong khubor ki pynpaw ba ïa katei ka kynhun ba la suba ba ki dei ki nongwan buhai shnong be-aiñ, la pynphai lyngba ka jaka khappud kaba khlem ker sainar shah hynrei la khanglad ïa ki ban rung biang sha ka jaka jong ka Bangladesh da ki nongshong shnong bad ki BGB, kaba la pynlong ïa ki ban sahkut ha ‘No Man’s Land’.
Watla ym pat don kano kano ka jingpyntip naki border security force (BSF) ne naki bor pulit Assam, hynrei ki tyllong khubor ki pynthikna ba mynta ka jinglong jingman kala kham biang bad ia kane ka kam la shimti da ki shipai BSF.
Ha kine ki sngi ba la dep, ka Assam ka la pynjur ïa ki kam pyrshah ïa ki nongwan buhai shnong be-aiñ bad katkum ka khubor na ki pulit la iathuh ba ym duna ia ka 150 ngut ki nong Bangladesh kiba la suba ba kim don kot don sla ki la shah pynphai biang na ki thain khappud.
Naka liang ki Pulit Assam ki la pynlong ruh iaka jingpynshisha ïa ki kot ki sla jong ki briew da kaba kem ïa ki katto katne ngut ki briew kiba la suba ba ki sah be-aiñ hapoh ka jylla.
Ki bor synshar shnong haduh mynta ki la kiar na ban pynthikna la ka jingpynphai iaki briew kadei ne shi bynta jong jingpynshisha ïa ki kot ki sla jong ki briew.
Kane ka jingjia ka wan hapdeng ka jingsngewkhia kaba nang jur ha shilynter ki thain khappud, ha kaba ki mat jong ka jingwan buhai shnong khlem kot ki sla bunsien ki pynmih ïa ki jingeh ha baroh ar tylli ki ri bad ka jingeh ki briew.
Ia ka jubab na baroh ar tylli ki Ri la peit bniah bha namar ba ka jingeh ka dang jur ha ki jaka khappud.
