Guwahati, Lber 06: Ki Pulit CID ka Assam kila khot hajir biang ia u Nongialam ka Liang Pyrshah Debabrata Saikia hynne ka sngi Balang ban kylli jingkylli halor ka jingkulmar kaba mih ha ka por ba pynlong ia ka Bharat Jodo Nyay Yatra ha Guwahati.
Ha ka ejahar, ki Nongialam ka Congress bad ki Nongkyrshan kila shah kynnoh ba kila pynkhein ia ka lynti iaid, pynjulor ia ki nongkynti Sorkar bad thombor ia ki Pulit kiba pahara hajan ka lad Kahanapara, Guwahati ha ka jingiadonlang u Rahul Gandhi bad ki Nongialam bala rangbah ka Congress.
Haba iakren bad ki nongthoh khubor, u Debabrata Saikia ula ong “Ngam tip balei ba kila khot hajir ia ngi, hynrei ngi khlem pynjulor ia ki nongkynti Sorkar. Ngi lah pan jingbit na ki bad ka jingpynkhreh ia ki bor pahara ia ka jingwan ki VIP kam long satia kaba biang.
Kumta, khnang ban tapeitmiaw ia ki jingbakla lajong, kila khot hajir ia ngi. Nga khlem lei eiei pyrshah ia ka Ain, kila khot hajir ia ngi tang ban pynibor”.
Ha ka sngi Nyngkong, ki Pulit ka Assam kila khot hajir ia u MLA ka Congress Jakir Hussain Sikdar bad uwei u nongialam ka Party ban tohkit halor kane ka case.
