Dibrugarh, Naiwieng 6: Ki Pulit ka Tinsukia ha ka sngi Balang, kila kem ia hynriew ngut ki briew kiba donkti ha ka kam khaii briew (human-trafficking) ha Eastern Assam kaba hap hapoh ka Tinsukia district.
Kine ki briew kiba la shah kynnoh la tip kyrteng kum u Dipak Phukan, Umakanta Chetri, Boby Deori Sona, Rohit Khadal, Peter Sabashi, bad u Ajit Munda.
Katkum ka tyllong khubor la iathuh ba ia u Dipak Phukan la ioh ban kem da ki paidbah nong shong shnong ka shnong Duarmara Singpo kaba hap hapoh ka jingpeit ka Pengeri Police Station ha ka sngi Balang kata ha ka 5 tarik u Naiwieng katba u dang pyrshang ban rah bor ia ar ngut ki khynnah rit najan ka tea estate.
Ki paidbah nong shong shnong kila aiti noh ia u Dipak Phukan sha ki Pulit jong ka Pengeri. Hadien ka jingtohit, ki pulit kila kem sa ia u Umakanta, Boby, Rohit, Peter bad u Ajit ha kaba iadei bad kane ka case.
Ki Pulit jong ka Pengeri Police Station kiba la register case (No. 28/2025) hapoh ka kyndon 143(5)/3(5) jong ka Bharatiya Nyaya Sanhita (BNS).
U briew uba kongsan uba la shah kynnoh u dei u Peter Sona, ia uba mynta u la phet rieh bad na ka liang ki pulit kila sdang ban thew jur na ka bynta ban kem ia u.
Shuh shuh ka tyllong kubor la iathuh ba kane ka kynhun khaii briew ki peit kliaw bad thmu ban rahbor ia ki khynnah na ki jaka per slasha ha kylleng ki bynta jong ka Upper Assam.
“Kiba bun na ki kam khaii briew la iathuh ba kidei na ka thain Doomdooma jong ka Tinsukia.Kane ka kam ka la nang kiew bha ha ki jaka rep slasha, kaba thmu ia ki nongtrei kper slasha kiba duk”, la ong ka tyllong khubor.
U la bynrap, “Ki khynnah na ki kper slasha ki shah khaii bad shah rah sha ka jylla Arunachal Pradesh na ka bynta ban leh ia ki kam iing kam sem, namar ba don ka jingduna bha ki nongtrei bylla sngi ha Arunachal Pradesh.”
“Jan man ka por, ngi ioh ban pyllait im ia kine ki khynnah napoh ka jylla Arunachal Pradesh. Kane ka kynhun ka trei bha ha ki bynta jong ki jaka kper slasha jong ka Upper Assam, bad ki don shibun ki dalal ne ki briew na katei ka jaka kiba don ka jingiadei bad kane ka kynhun ba khaii briew,” ong ka tyllong khubor ki pulit.
 ha Eastern Assam kaba hap hapoh ka Tinsukia district.){kind=link}