Guwahati, Rymphang 14 : Ka Indian National Congress (INC) kala nang jakhom arshah mynta hadien ka jingwan jong ka Bharat Jodo Nyay Yatra jong u Rahul Gandhi ha Assam, da ka jingnang iai iehkam ki nongialam bad ki MLA katba nang mih ki sngi.
Hynne ka sngi Balang, sa u MLA ka Congress na Karimganj North, u Kamalakhya Dey Purkapastha, ula iehnoh ia ka kam Working President ka Assam Pradesh Congress Committee (APCC) bad shu long tang u dkhot ka party.
Ha ka shithi bala phah sha u President ka APCC, ula pyntip ba un iai bteng ban trei noh tang kum u dkhot ka Party.
Une u MLA ka Congress lem bad u Basanta Das, kila iakynduh bad pyndon burom ia u Myntri Rangbah ka Assam Himanta Biswa Sarma hynne hi ka sngi Balang. Kine baroh arngut kila ai ia ka jingkyrshan sha ka BJP hapoh ka Iingdorbar Thaw Ain ka Assa,
U Purkayastha ula shah jied kum u MLA ha ka sien ba nyngkong eh ha u snem 2011, da kaba pynliem ia u MLA ka BJP Ranjan Das.
Haba iakren bad ki nongthoh khubor u Purkayastha ula ong “Hooid, nga la ioh pdiang ia ka jingtyrwa na u Myntri Rangbah ka Jylla bad nga la pdiang ia ka jingtyrwa jong u”.
Haduh mynta hi kam pat long shai la u Purkayastha un leit pyniasoh noh sha ka BJP ne un shu kyrshan ia ka Sorkar BJP hapoh bad shabar ka Iingdorbar Thaw Ain.
