Guwahati, Jymmang 24: Hapoh shisnem duna shuwa ban wan ka elekshon Lok Sabha 2024 bad ka elekshon MLA ha Jylla Arunachal Pradesh, ka NPP kala pynlong ia ka rally kaba heh bha hynne ka sngi Balang ha madan Longding, ban pynkhreh ialade ha kaban lah khring ia ki paid nongthep vote.
Da ki hajar ngut ki nongkyrshan bad ki nongtrei ka party kila wan ban iashimbynta ha kane ka rally hapdeng ka suinbneng kaba thut.
U President ka NPP ha Arunchal Pradesh bad Myntri barim Thangwang Wangham, ula wan iashimbynta ha kane ka rally kum u Kongsan ha ka jingiadon ryngkat u General Secretary (Organisation) Paknge Bage, Secretary Tapi Sorang, Youth President ka NPP State Unit Damboy Ropuk, Myntri Sorkar barim Hejam Ponglaham bad kiwei kiwei.
Ha ka jingkren, u Wanghal ula ther tyngeh ia ka Congress bad ka BJP halor ki jingkynnoh kam bamsap, kaba la pynlong ia ki jaka kum ka Longding ban iai bteng ha kaban long kaba sahdien.
Une u President ka NPP ula kular ruh ba lada ka NPP ka shah jied ban wan ha ka bor, ka NPP kan pynthikna ia ki kam pynroi ba janai hapoh ka Jylla khamtam ha ka koit ka khiah, ka pule ka dangle bad ki lad pyniasoh.
U Wangham ula pyntip ruh ha ka jingialang ba u National President ka NPP bad Myntri Rangbah ka Meghalaya Conrad K Sangma un sa wan sha Arunachal Pradesh ban ialap elekshon na ka bynta ka party ha ki sngi ban sa wan.
