Agartala, Risaw 15: U Myntri Rangbah (CM) ka Tripura u Dr Manik Saha hynnin ka sngi Thohdieng ula ong ba ka BJP kala wanrah ia ki kam pynroi hapoh Tripura katba kiwei pat ki party ki wanrah ia ki jingiaumsnam ha ka jylla.
Ia kane une u CM ka Tripura ula pynpaw haba kren ha ka jingialang paidbah ha Kailashahar hapoh Unakoti district.
“Baroh ki party ki don ia ka histori kaba iadei bad ki kam iaumsnam ha ki kam sain hima sima,” ong u CM ka Tripura u Dr Manik Saha.
Nalor kata ula kynnoh ruh ba ka Tripura kala sakhi ia ki kam pyniap bad ki kam thombor ha ki 35 snem ka jingsynshar jong ka CPI-M ha ka jylla.
Haba pynpaw halor ki skhim kam pynroi bala wanrah da ka sorkar BJP hapoh Tripura, u Saha ula ong ba ka saffron party kam don satia ia ka jingngneit ha ki kam pyntriem.
“Ka BJP kala trei shitom na ka bynta ka bha ka miat jong ka jylla bad ki nongshong shnong ki jong ka naduh ba kala wan ha ka bor ha u snem 2018,” ong shuh shuh u CM ka Tripura.
