Shillong, Risaw 15 : Ka Sorkar Jylla kala pynkhreh ban pynlong ia ka sorjamin bad jingwad bniah ia ka jinglong jingman jong ka jaka ban shna ia ka Greefield Airport ban pynthikna la ka jaka ka biang ne em ban pyniaid shakhmat ia ka project.
Ia kane ka jingwad bniah bad sorjamin yn sa pynlong ha ka 27 bad 28 tarik u Risaw, pyntip ka sorkar sha ka Iingkashari Division Bench jong ka Meghalaya High Court kaba shong bishar ia ka PIL ha ka sngi thohdieng.
Ha ka hukum, ka iingkashari kala ong ba ka sorkar kala pyntip ba ka jingwad bniah ia ka jinglong jong ka jaka, yn sa pynlong ha ka 27 bad 28 tarik Risaw.
“Namar la bthah ban wanrah mynta ka sngi ia kane ka kam ban pynthikna ba ka sorkar kala leh ia ki kam ba donkam na ka bynta ka Greenfield project, buh ia kane ka kam ban bishar biang hadien saw taiew” kala ong.
Ka hukum ka ong ruh ba ka Airport Authority of India (AAI) kala kdew ba don katto katne ki jingsiew kiba hap ban siew daka sorkar Jylla ha kaba ka sorkar kala pyntip ba kala dep ban pyllait haduh T. 23.60 lak bad ia ka jinglut jingsep n aka bynta ka jingwad bniah ia ka jinglong ka jaka ruh yn da pynlut da ka sorkar khlem da pynslem.
Ka Iingkashari kala bthah ruh ia ka Jylla ban pynthikna kumba ka bthah nyngkong, ba kam dei ban don kano kano ka jing kyntur pud ha kane ka jaka.
“Na ka bynta kane ka kam, kumba la bthah nyngkong, dei ruh ban shondur noh da ki drone na suin khnang ba kino kino ki jingkam thok kiba lah ban mih, yn lah ban leh ia kaba donkam” kala ong.
Ka Iingkashari kala buh ban shong bishar biang ia kane ka kam ha ka 11 tarik u Naiwieng.
