Itanagar, Jymmang 23: Ki nongshnongshnong ka thain Siang kila sdang ia ka jingiakhih ba khlem buh por hadien ka jingwan poi ki shipai ki ba pynlong ia ka sorjamin bad peit bniah na ka bynta ka Siang Upper Multipurpose Project kaba11,000 MW.
Ki paidbah kiba dei na ki 27 tylli ki shnong, kila ialum paidbah ha ka sngi Thohdieng ban pynpaw ia ka jingpyrshah kaba jur bad kynthoh jir ia ka jingkynnohleh donbor ki shipai khlem da sngap shuh ia ka jingsngew ki trai shnong bad kumjuh ruh ban iada ia ka mariang.
Katkum ba la sakhi ha ki pla crad ba kila rah kila thoh da kine ki kyntien “No Dam, No Survey,” bad ki paidbah kila pynpaw ka jingsngewkhia halor ka jingdon ki bor pahara kiba la shna ia ki ktem shipor da kaba tap da ki tarpaulin rong blue ha kane ka thain.Ki nong shong kila shim ia kane ka jingleh kum ka jingleh ban pynduh ia ka hok ki paidbah ha kaba iadei bad ka khyndew ka shyiap bad kumjuh ruh ia ka jingiada ia ka mariang.
“Ngi pyrshah jur ia kane ka bad ngim kwah ia kane ka dam namar ba kan sa pynjot ia ka mariang bad kumjuh ruh ka jingshah ktah ia ki spah tylli ki long iing” la ong ki nongiakhih. “Lada tei ia kane ka Dam kan sa don ka jingshlei um sha ki bynta ba shapoh bad kane kan sa ktah ia ka ioh ka kot”.
Ka seng ki samla pule bad kiwei de ki kynhun seng trei mon sngewbha kila pynrem jur ia ka jingwanrah ia kine ki bor pahara da kaba khot ba ka dei ka rukom pyntieng pynsmiej ym ka sienjam sha ka jingïakren kaba don jingmut.
Ki pynpaw ruh ka jingpyrshah ba kum kine ki jingleh ki pynduh ia ka jingshaniah bad ki iaid lait ia ka jingiakren kaba biang bad ki briew ki ba shah ktah.
Ka Wah Siang River, kadei kaba kongsan eh na ka bynta ka Brahmaputra namar ba ka wan sha India na Tibet, bad kane ka long ka tyllong um kaba donkam eh na ka bynta ka Northeast India. Kane ka jingthmu ban tei ia ka hydropower project ka kular ban pynmih bording haduh 11,000 megawatts.
Hynrei ka sorkar jong ka jylla Arunachal Pradesh ha ryngkat bad ki bor ba dei khmih jong ka sorkar kmie ha New Delhi kila kyrshan ne iada ia kane ka project da kaba pynpaw ba kane kadei ka mat ban iada ia ka ri.U Myntri Rangbah u Pema Khandu bunsien u la pynpaw ia ka jingdonkam ban don ia kane ka Dam ka ban iakhun pyrshah ia ka China kaba don ia ka Medog Dam ba 60,000 MW kaba don ha ki bynta jong ka Yarlung Tsangpo kaba don sharum jong ka Tibet.
Wat hapdeng ka jingkular, hynrei ka jingpyrshah ka dang khlain dang khlain, ha kaba ki nongiakhih kila pynpaw ba kin btengbeit ia kane ka jingiakhih jong ki tad haduh ban da pynsangeh ne weng noh ia kane ka project.
