Shillong, Jymmang 23 : Ki Pulit ka West Jaintia Hills ha ka sngi Thohdieng kila pynmih ia ka jingbthah ba kyntu ia ki paidbah ba kin husiar bad phikir bha ia ki jingtip ba shimet ban lait na ki jingshah thok shah shukor da ka jingmih sa ki runar kiba shukor briew lyngba ka whatsapp.
Kane ka jingbthah kala mih hadien ka jingioh pdiang ia ka jingujor na ki nongshongshnong ka sor Jowai ba iadei bad ka jing shah tuh (hack) ka whatsapp account, kaba la pynkhuslai shikatdei eh ia ki nongshongshnong ka thain.
Naduh ka 18 tarik Jymmang, la bun ngut ki briew kila pyntip ba ki Whatsapp account jong ki, kila shah pyndonkam bakla ha ki briew ki bym lah ban ithuh, kiba la tuh (hack) ia ka account jong ki.
Hadien kane, kine ki runar kila phah message pat sha ki phone nombor jong ki briew ban dawa pisa bad pyntieng pynsmiej ba ha rukom.
Kine ki runar da kane ka whatsapp account, ki ju phah message sha ki paralok ne bahaiing bahasem jong kine ki lanot, ba kyrpad ban ai pisa kylliang bad ter ter.
“Ka kynhun ki Pulit ka dang pynlong ia ka jingtohkit halor kine ki jingjia” ong u Superintendent of Police Bah C Syrti ha ka kyrwoh.
“Namar kane ka jinglong jingman, la kyntu ia ki paidbah ba kin phikir bha bad ban bud ia ki lad jingiada ban nym ai ia ki jingtip ba shimet sha ki briew khnang ban lait na ka jinglong lanot ha kane ka jyrsieh” ula bynrap.
Une u Heh Pulit ula kyntu ia ki paidbah ba kin kiar ha kaban jubab ia ki message ki ba wan na ki briew ki bym ithuh, kiar na ka jingia message bad ki phone nombor ba kim tip bad ban wad jingtip ruh ba thikna ia ki nongphah message kat ki lad kiba don hashuwa ban jubab.
Nalor kane, ula kyntu ruh ba kin husiar ia ki attachment ba ki ioh na ki whatsapp khamtam na ki nombor ba kim ithuh, kiar na kaba ai ia ki OTP bad ban pynthikna shuwa ia ka tyllong shuwa ban ai ia kino kino ki jingtip.
Une u Heh Pulit ula kyntu ruh ba kin pyndonkam ia ka Two-Step Verification jong ka Whatsapp bad ban pyntip mardor sha ki Pulit lada ki don jingsuba ba ka whatsapp account jong ki, kala shah tuh khnang ba ki Pulit kin ioh pynlong ia ka jingtohkit.
Ula ong ba lada don kano kano ka cybercrime, ki briew ki lah ban ujor online sha ka www.cybercrime.gov.in bad lada ngat ha ka jingshah thok pisa, kin phone mar mar ha u nombor 1930 ban ioh ia ka jingiarap.
