Guwahati, Lber 17: U Myntri Rangbah (CM) ka Assam u Himanta Biswa Sarma hynnin ka sngi Palei u la pynpaw ia ka jingangnud ban khang khyrdep ia baroh ki madrassa ha ka jylla bad ong ba ki briew mynta ki kwah ban beh sha ka jingnang jingstad hapoh ki skul bad ki kolej.
“Haduh kumba 600 tylli ki madrassa Nga la khang khyrdep ha ka jylla bad Nga don ia ka jingangnud ban khangdam ia baroh ki madrassa namar ngim kwah ia ki madrassa. Ngi kwah ia ki skul, kolej bad ki university,” ong u Sarma haba kren ha ka jingialang ‘Vijay Sankalp Yatra’ jong ka BJP ha Belegavi, Karnataka hynnin ka sngi Palei.
Ha u bnai Kyllalyngkot mynta u snem, u Sarma ula dep ban pynpaw ba na ka liang ka sorkar ka kwah ban pynduna ha kaba iadei bad ka jingdon jong ki madrassa ha ka jylla ha ka kylla kaba nyngkong.
“Ngi kwah ban pynduna ha kaba iadei bad ka jingdon jong ki madrassa ha ka kylla kaba nyngkong. Ngi kwah ban wanrah da ka pule puthi kaba kynthup lang ia baroh ha ki Madrassa ,” ong u CM Sarma.U Sarma u la ong ruh ba na ka liang ka sorkar ka la iatreilang bad ki nongshong shnong kiba dei ki Muslim halor kane bad ba kila iarap ruh ia ka sorkar.
Nalor kata u la ong ruh ba ka sorkar Assam ka la sdang ban pyrshang ban kynthup ia ki nongshong shnong kiba dei ki Muslim, khamtam ki muslim kiba kren ia ka ktien Bengali kum ki nong ia don bynta lang ha ka jingialeh jong ka sorkar pyrshah ia ki lehnoh Islamist bad ki lehnoh Jihadi.
Haba kren shuh shuh ha katei ka jingialang, u CM ka Assam u la khot ruh ia ki paid Hindu ba kin sngew sarong halor ka jingithuh na ka bynta jong ki.
“Baroh ki Muslim kin kam ba ki long kawei.Kumjuh ruh ki Hindu ruh ki dei ban iathuh ba ki dei ki Hindu da ka jingsngew sarong,” ong u Sarma.
