Ka jingiakren iasuk bad ka HNLC kala jan poi sha kaba kut :Paul
Shillong, Lber 17: Ka kynhun Myntri kaba la iakynduh hynne ka sngi thohdieng kala ai jingmynjur iaka Governor Address ne ka jingkren lamphrang jong u Lat ka ban long hapoh ka iing dorbar thawain ka jylla ha ka 20 tarik Lber.
Hadien ba la wai ka jingialang jong ka kynhun myntri, u Myntri Sorkar uba long ruh u Nongaiktien jongka sorkar MDA u Bah Paul Lyngdoh ula ong, ba u Lat ka jylla yn sa ai jingkren hapoh ka iing dorbar thawain ka jylla haka Lah Sngi u Blei kaban dei ka sngi sdang jong ka Dorbar Mang Tyngka.
“Kan ym long kaba iahap ia nga ba ngan iathuh lut ha kaba iadei bad (Governor’s Address) namar kan ym long shuh kaba shongkhia haka Lah sngi u Blei, hynrei ngi la kynthup ia kiba bun ki mat kiba ka sorkar kan phaikhmat bha, naduh ki jingtei bad ki mat kiba kongsan kiba ngin pynleit jingmut kum ka sorkar” ong u Bah Paul.
Ula pyntip ba ka kynhun myntri kala iatai ia ki mat ha kaba iadei bad ka jingjia ha Mukroh bad ia ki lad ki lynti kiba ka sorkar kala shim ha kaba iadei bad katei ka mat.
“Ngi lah kdew ia ka jingiakajia pud hapdeng ka Assam bad Meghalaya bad ngi la raikut ban pynbeit noh ia u pud u sam jong ki 6 tylli ki jaka kiba don hapdeng ka jingkajia pud ha kata ka rukom ba kan long kaba biang bad kaba shongsuk bad kaban ai jingmyntoi ia ki nongshong shnong ha baroh ar tylli ki jylla” ong u Bah Paul.
Nalor kane, ula iathuh ba ka jingiakren iasuk bad ka kynhun kieng atiar Hynniewtrep National Liberation Council (HNLC) kala poi sha ka jingiakren kaba khatduh.
“Ngi la kdew ia katei ka jingiakren kaba dang iaid shakhmat bad ka HNLC ha kaba kan sa poi noh syndon sha kaba kut” u la ong.
U Nongaiktien ka sorkar ula iathuh baka sorkar jylla kan shimkhia bha haka jingiakhun pyrshah ia ki kam khaii drug bad ka sorkar kan iakhun ia ka thma pyrshah ia ka jingkhaii drug ha kino kino ki rukom.
“Ka jingioh kurup ia ki jingdih kiba sinew kala kiew sha ka 71 Klur katba ngi dang kren bad ki pulit kila peitngor bha ban iaid shakhmat ban iakhun iaka jingdie bad jingkhaii be-aiñ ia u drug. Ngin ym pyllait ia ki nongdie la kidei kiba rit ne kiba heh bad ngin ym pyndem tdong ha kaba iadei bad ka jingkhynra, jingkurup bad jingtalasi ia u drug bapher bapher” la ong u Bah Paul.
Ula pyntip ruh ba ka sorkar kala dep ban thaw 5 tylli ki Fire and Emergency Stations, 9 tylli ki Outpost kiba thymmai, 5 tylli ki Police Station kiba thymmai bad 7 tylli ki Border Outpost.
Ula ong, ha ka Governor Address yn kren ruh ha kaba iadei bad ka kam rep kam riang, ka bha ka miat jong ki nongrep bad ki kam ri jingri.
“Kaba bun hi yn phaikhmat ha kaban kyntiew shaphrang bad yn pyrshang ban pyndonkam iaki jingdon jingem, ka pisa naka sorkar pdeng bad Externally Aided Funds naka bynta kitei ki projek baroh. Kaba kham kongsan kal ong ruh ha kaban pynleit jingmut bha na ka bynta ki samla, arts & culture bad yn sa iohsngew ia kine shisien ba la dep ban pynwandur bha bad la rah syndon hapoh ka iing dorbar thawain ka jylla” ong u Nongaiktien ka sorkar MDA.
Ula iathuh ruh ba yn phaikhmat ruh ha ki bynta kiba iadei bad ki kam jngohkai ba kan long kaba iaineh, ban aikam aijam, ban iashimbynta da ka imlang sahlang bad yn ialeh ban pynkhlain iaka jingpynmih ia ka bording elektrik bad ban shim ia ki lad jingiada haba wan lyngshop ka bor mariang khamtam haba ka don ka jingkylla khah khah jong ka mariang bad ka jingjur jong ka eriong bad kine kidei kiei kiei kiban sa paw haka Governor’s Address.
