Shillong, Nailur 17 : U Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Palei, ula pyntip ba ka Sorkar Jylla kala dep pynbeit ia ka jingiakajia halor ka jingkynnoh wan lum khana samari ka Assam ha Langpih.
“Ia kane ka kam lah dep ban pynbeit. Ha kano kano ka jaka ba ka Sorkar Jylla kala dep lum ia ka khana samari, ngi la iakren bad ka Sorkar Assam, ba kam dei ban pynthut shuh bad kila leh ia kata” ula ong.
U iathuh ba kum kane ka jingjia kala jia ruh ha Mukroh bad ia kane ruh la dep ban pynbeit.
“Kum kane ka juh ka jingjia kala jia wat ha Mukroh bad ngi la dep pynbeit ia ka” ula ong haba bynrap ba ka Sorkar kala bthah ia u Chief Secretary ban iakren mar dor haba don kum kine ki jingujor bad u Chief Secretary ka Assam.
“Ngi sngew kmen ban pyntip ba wat na ka liang ka Assam kila ai ka jingiatreilang haba mih kum kine ki jingbym iasngewthuh jingmut” ula bynrap.
