Shillong, Nailur 17 : Namar ka jingjur ka jingkawang petrol bomb ia ki Ophis Sorkar, ki kali bad ki Police Station ha Shillong, u Symbud Myntri Rangbah ba khmih ia ka Tnad Pohiing (Police) Bah Prestone Tynsong ha ka sngi Palei ula maham ba ka Sorkar kan ym shu sngap jar ia kum kine ki kam bymman bad kan leh da kaba tyngeh.
Haba pyntip ba ka Sorkar kala pynkhlain bha ia ka bor pahara, u Bah Prestone u iathuh ba ula dep bthah ia ka Director General of Police ban shimkhia shuh shuh ia ka kam bad hukum ban pyndait kham bun ki kor CCTV bad pynkhlain ia ka jingiaid pahara ha Sor.
“Ia kane la shimkhia da ki Pulit bad nga la dep bthah ia ka DGP ba kan shimkhia shuh shuh ia ka kam” ula ong.
“Nga la dep bthah ia ki ba ki hap ban pynkhlain shuh shuh ia ka pahara da kaba pyndait shuh shuh ia ki kor CCTV ha ki jaka kiba donkam, ia kane hap ban leh, bad ha kajuh ka por ki Pulit kin pynkhlain ruh ia ka jingiaid pahara ha sor” ong u bah Prestone.
Haba kylli haduh lano yn dang iohi ia kum kine ki jingjia, ula ong “Phim lah ban ong haduh lano, phi iohi ba ki kam runar ki jia man ka minit”.
Haba kular ia ki paidbah ba ka Sorkar kan leh tyngeh, ula ong “Ngi kular ia ki paidbah ba na ka liang ka Sorkar, kaei kaba lah ban leh ngin leh bad ngin ym shu sngap ia kum kine ki kam bymman kiba jia man ka sngi bad nga maham biang sa shisien, kito ki riew runar, ba kin sangeh ka leh kam pyntreim bad ka ain kan buddien ia ki bad kin sa ioh ia ka jingbishar bah ok”.
Halor ka jingdonkam ia ki bor pahara, u Bah Prestone ula ong ba ki Pulit ka Jylla ki lah ban tehlakam ia kane ka jinglong jingman.
