Shillong, K’lyngkot 21 : U Myntri Rangbah Duh ka Ri ha ka sngi Balang, ula ai khublei ‘Sngi ioh Jylla lajong’ ia ka Jylla Meghalaya, Tripura bad Manipur haba ai jingiarop ia ka kolshor ba riewspah kine ki Jylla, ka jingiaid shakhmat ka roi ka par bad ka jingnoh synniang jong ki nongshongshnong sha ka jingjam shakhmat ka ri India.
Ha ka shithi ba 21 tarik Kyllalyngkot 2026, bala phah sha u Myntri Rangbah ka Jylla Conrad K Sangma, u Myntri Rangbah Duh ula shim iaka Meghalaya kum ka ri kaba kaba don “ka jingitynnad ba kyrpang jong ka mariang bad ka pateng tynrai ba riewspah,” ba la pynwan dur da ki riti dustur ba kyrpang jong ki jaidbynriew Khasi, Garo bad Jaiñtia.
U la ong ba ka jingburom kaba jylliew jong ka jylla ia ka mariang, ka mynsiem jong ka jingiatylli bad ka jingaiti ha ka jingpynkupbor ia ki kynthei ka dang iai bteng ban pynriewspah ia ka kolshor jong ka ri India.
Haba pynkynmaw ia ka jingwan iuhkjat jong u ha Jylla, u Modi ula ong ba ula shu “iapbiej iaka Jylla bad ia ki paid nongshongshnong” bad kren halor ka jingwan jong u ha u snem 2016 sha Shillong na ka bynta ka Northeasten Council Plenary meeting kum ka jingkynmaw ba kyrpang.
Haba kren halor ka jingpynleit jingmut ka Sorkar Pdeng sha ka thain Shatei Lam Mihngi naduh u snem 2014, u Myntri Rangbah Duh ula iai ban ba kane ka thain ka dei ka ‘Ashtalakshmi ka ri India’ bad ong ba ka jingpynkylla dur ia ka, ka dei ka mat ba hakhmat eh jong ka Sorkar jong u. Ula pynpaw ba ki jingtreikam ka Sorkar NDA kila pyni ia kane ka jingaiti lut, haba bynrap ba ki jingwan iuhkjat jong u bad ki Myntri ka Sorkar ha ka thain kala kiew bha ha ki snem bala lah.
U Modi ula ai jingiaroh ruh ia ka jinglehbha ka Meghalaya ha ka ioh ka kot hadien ka khlaw Covid, haba ong ba ka jingkiew shaphrang jong ka jylla ka dei ka nua, haba iaroh ia ka jinglah pyniaid bha ka Jylla ia ka pisa tyngka. Ula ong ba ki jingpyrshang ha ki tnad kum ka housing, agriculture, ka koit ka khiah bad ka pule puthi kala aibor kaba khlain sha ka roi ka par jong ka Jylla.
Haba kren halor ka G20 Presidency ba long ha India, u Myntri Rangbahduh u la ong ba ka Meghalaya ka la pyni ïa ka jinglong ba pdiang sngewbha jong ka da kaba pynlong ïa ki jingïalang jong ka pyrthei, kynthup ïa ka jingïalang Think20 bad ka jingïalang kaba ïadei bad ka kam haw haw, kaba ïarap ban buh ïa ka jylla ha ka map jong ka pyrthei bad ban kyntiew ïa ka kam jngohkai pyrthei hapoh ka ri.
U Myntri Rangbah Duh ula kular ban pynbteng ia ka jingkyrshan jong ka Sorkar Pdeng sha ka roi ka par ka Meghalaya kynthup ha ki kam ialehkai bad ka kolshor. Haba pynpaw ba ka Jylla kan pynlong ia ka National Games ha u snem ban wan, ula ong ba ka Sorkar Pdeng kan kyrshan ia ki nongialehkai donsap bad ki jingtei ba donkam, haba aimynsiem ia ka jingnoh synniang ka Meghalaya bala ithuh ha kylleng ka pyrthei ha ka kam ka put ka tem bad ka Art.
U Myntri Rangbah ka Jylla Conrad K Sangma ula ai khublei ia u Myntri Rangbah Duh halor kane ka jingai khublei “ioh jylla la ka jong’ bad pynpaw ia ka jingsngewnguh na ka byta ki paidbah ka Meghalaya halor ka jingiai bteng ban pyni lynti bad ai jingkyrshan ba khlem sangeh jong ka Sorkar India bad ki Ministry bapher bapher ka Ri ban pyntyllun sted ia ka jingkiew shakhmat ka Jylla. Ula ong ba u sngewktah bha ba u Myntri Rangbah ula burom ia ki jingiohi jngai jong u PA Sangma, uba ki jingthmu jong u, ki iai bteng ban ai mynsiem ia ka Meghalaya ban jam shakhmat.
Ka Meghalaya, Manipur bad Tripura kila ioh iala ka jong ka Jylla ha ka 21 tarik Kyllalyngkot, 1972.
