Shillong, K’yngkot 21 : Ka kynhun ki Nongialam ka BJP ba ialam da u Myntri Sorkar Bah Sanbor Shullai, kala phah tuklar lem ha u Myntri iada Ri Rajnath Singh, ban lah pynbeit noh kloi ia ka kam ba sahteng ha kaban pynkynriah ia ki Dalit Sikh na Them Mawlong sha Contonment Area.
U Bah Sanbor ula mihkhmat kum u MLA jong ka thain Shillong Contonment, ula pynpaw ia ka jing long kynrum kynram bad kongsan kane ka kam, haba kyntu ia ka Ministry ban shim noh kham kloi ia ka rai kaba mynjur lang.
Ka kynhun kala kyrpad ruh ia u Myntri ka Sorkar Pdeng ban pynthikna ha ka jingpyntreikam kloi ia ka Building Byeplaw bala mynjur dang shen da ka Contonment Board bad ban pynsted noh ia ka jingpyn thymmai ia ka polcy hapoh ka Contonment Area.
Nalor kane, ki nongialam kila kyrpad ia ka jingmynjur ba kham kloi na ka bynta ka jingaiti ia ka jaka kaba donkam na ka bynta ban lah pyndep noh kloi ia ka Shillong flyover project.
“U Myntri kam iada ri ula sngap bha ia ka kynhun bad kular ba ia kine ki kam baroh bala pynsngew, un sa shong bishar bad un sa iakren ruh bad ki bor ba dei khmih” ong u Bah Sanbor.
Ula pynpaw ba ka kynhun kan sa iakynduh ruh biang ia u Myntri kam iada ri ban buddien ia kine ki kam bad ban pynthikna ia ka jingpyntreikam kloi ia ki.
