Shillong, Jan 21: Ka Apex Council ka Meghalaya Cricket Association kala ai khublei ia u Lakhan Singh Nahar halor ka jingnoh synniang ka jong u ha ka jingialehkai cricket ha ka jylla khamtam haba une u nongkawang bol ula pynbna ba yn shongthait noh.
U Lakhan ula ialehkai ha ki 17 ki jingiakhun ha ka Senior Team jongka Meghalaya ha ki Tournament kiba la pynlong da ka BCCI bad ula mih ha ka sien kaba nyngkongeh ha u Nailur 2020 ban iakhun pyrshah ia ka Mizoram bad ha katei ka por ula ioh khur 22 wiket.
U Lakhan ula ialehkai ruh na ka bynta ka Meghalaya U-19 ha u snem 2016 bad ula shah jied ruh ha ka Joint Affiliate bad Associate Team U-19 ha utei u snem ha shwa ba ka Meghalaya kan long ka dkhot kaba pura jong ka BCCI.
Nalor kane u Lakhan ula mihkhmat ruh ia ka jylla ha ka U-23 level bad udei u nongialehkai uba la paw bha ha ka jylla ha kaba ula don bynta bad ki club kiba heh ha Shillong ha ki snem kiba la leit.
Ka MCA Apex Council ka ai khublei ia u Lakhan halor ka jingai jingshakri ka jongu kum u nongialehkai Cricket ka jylla ha ki kyrdan bapher bapher bad kala kitbok ia u halor ka jingthmu ban bynshet ia ka kam ban leit pyntbit kum u Coach,
Trainer, Umpire bad kiwei kiwei.
