Nongpoh, 21 K’lyngkot: KA Ri Bhoi District Sports Association (RBDSA) hynne ka janmiet Sngi U Blei, kala pdiang bad pynkup burom ia ki nongialehkai ka District kiba dang wan phai na ka lympung ialehkai Meghalaya Games 2024 kaba kut hynnin ka sngi saitjain ha Tura.
Ia kine ki nongialehkai la pdiang burom ha ka jingialang kaba long hapoh ka phyllaw jong ka Ophis u DTO, Nongpoh ha ka jingiadonlang ki kynhun Sengbhalang bapher bapher ka Ri-Bhoi.
Ka Ri Bhoi District kala wan ba-ar ha ka jingioh khur takma ha kane ka lympung ialehkai ba heh duh jong ka Jylla. Kane ka District kala ioh khur 79 tylli ki Takma, kiba kynthup 27 tylli ki Takma Ksiar, 22 tylli ki Takma Rupa bad 30 tylli ki Takma Rnong.
Ki nongai jingkren ha katei ka sngi, ki la ai ka jingiaroh ia ki rang bad ki thei ialehkai, namar ka jingtrei shitom ka jong ki, kaba la pynlong ia ka Distrik ban ioh ia ka kyrdan kaba ar, watla ka Ri Bhoi ka dei kata ka Distrik, kaba dang don hapdeng shibun ki jingduna na bynta ban pynbiang ia ki nongialehkai ha ki kam ialehkai bapher bapher.
