Shillong, Jymmang 14 : Ka Kynhun ki heh ki hain ka UNICEF kila ai jingiaroh ia ka rukom treikam kaba lamkhmat da ka imlang sahlang ha Meghalaya ban pynioh ia ka koit ka khiah jong ki Kmie ba kha Khun bad ki Khunung, haka jingialang bishar kam bad u Myntri Rangbah Conrad K Sangma ha Shillong.
Pleased to meet Ms. @SoledadHerrero and the team from @UNICEFIndia to discuss Meghalaya’s ongoing initiatives in maternal and child health, nutrition, and early childhood development.
Grateful for her appreciation of our Government-community partnership model in driving… pic.twitter.com/p4E22oGk0J
— Conrad K Sangma (@SangmaConrad) May 14, 2026
Ka jingialang kala pynleit jingmut halor ka jingiatreilang kaba dang iaid shakhmat ha ka liang ka koit ka khiah ki Khunlung, ka jingpynbiang jingbam tei met, ka jingsumar ia ki Kmie ba kha Khun, ka jingai tika, ka heh ka san ki samla lud, bad ki kam ba pyntrei bad lamkhmat da ka imlang sahlang ha kylleng ka Jylla.
Ha ka jingïalang, ka kynhun UNICEF ka la sam ïa ki jingshem na ka jingleit jngoh ba ar sngi jong ki ha kylleng ki jaka ha Meghalaya, kynthup ki jingïakren ha madan bad ki nongtrei ba hakhmat ha ka koit ka khiah, ki kynhun longkmie, ki village health council, ki heh distrik, bad ki nongïalam samla.
Ka kynhun ka la pynpaw ïa ka jingsngewnguh ïa ki prokram jong ka Sorkar Jylla kiba ïalam da ki paidbah kiba thmu ban kyntiew ïa ka jingai tika, ban pynduna ïa ka jingïap ki kmie ba kha khun, ban pynkhlaiñ ïa ki jingmih ha ka jingsam jingbam tei met, bad ban kyntiew ïa ka jingïashim bynta jong ki samla.
Uwei u heh ka UNICEF u la ong ba ka Meghalaya ka long ka Jylla kaba pyni ïa ka jingïalam kaba khlaiñ ha ka roi ka par jong ki briew kaba buh hakhmat ïa ki khynnah. Une u heh u la kdew ba ka synsharkhadar bala ialam da ki shnong ha Meghalaya, ha ryngkat bad ka jingïalam jong ka sorkar bad ki jingïatrei lang kiwei ki bor treikam, kala pynmih ïa ka jingktah kaba lah ban thew ha ki shnong ki thaw.
Ka kynhun UNICEF ka la ban jur ruh ïa ka rukom treikam jong ka Jylla kaba pynïasoh lang ïa ka koit ka khiah jong ki kmie bad ki khynnah, ka jingsam jingbam tei met, bad ka jingheh jingsam jong ki khunlung ha ki snem ba nyngkong, haba kdew ba ka Meghalaya ka dang ïaid sha ka “003 Agenda” — ym don ka jingïap ki kmie ba kha khun, ym don u khynnah uba ym pat shym ai tika, bad ban pyntikna ba uwei pa uwei u khynnah u ïoh ïa ka jingheh jingsan kaba koit ba khiah ha ki 1,000 sngi ba nyngkong jong ka jingim, kaban khanglad ïa ka jingswai bad ailad ïa ki khynnah ba kin kot ia ka jingheh jingsan ba pura.
Ha ka jingïakynduh, la iakren bniah bha halor ki jingpyrshang ba dang iaid shakhmat jong ka Jylla hapoh ka Mission 1000 sngi. Kane ka prokram, kaba la sdang ha ka 31 Lber mynta u snem, ka thmu ban ïakhun pyrshah ïa ka jingswai jong ki khynnah, pynbha ïa ka koit ka khiah jong ki kmie bad ki khynnah, bad pynkhlaiñ ïa ki jingiarap ha ki 1,000 sngi kiba kongsan tam jong ka jingim.
Ka kynhun ka la ïaroh ruh ïa ki jingpynlut jong ka Meghalaya ha ka roi ka par jong ki samla lud bad ka jingpynïadon bynta ïa ki samla. Ki nongmihkhmat ka UNICEF ki la kdew kyrpang ïa ka jingpynkha ïa ka Young People’s Action Group, ha kaba kila pynpaw ba ka long ka rynsan kaba don jingmut ha kaba ki samla ki lah ban noh synñiang ha ki jingïakren ban thaw ia ki policy bad ki kam pynroi kiba hakhmat eh. Ki la kdew ba ka jingkloi jong ka Jylla ban pynrung ïa ka jingïashim bynta jong ki samla ha ka rukom treikam ka pyni ïa ka synshar khadar kaba ïaid shakhmat kaba lah ban long ka nuksa ïa kiwei pat.
Ha kaba kren ha ka jingïalang, u Myntri Rangbah Conrad K. Sangma u la ong ba ka rukom pynroi jong ka Meghalaya ka buh hakhmat eh ïa ka roi ka par jong ki briew bad ka jingwanrah ïa ki rukom treikam kiba neh slem ym tang ïa ki skhim kiba ai shimet shimet.
U la kdew ba ka Jylla ka la shim da ka lynti kaba pynïasoh lang, da kaba wanrah lang ïa bun ki tnat, ki prokram, bad ki kynhun ba iadonbynta ban pynbeit ïa ki jingdonkam jong ki nongshong shnong naduh ka por ba ki dang dei ki khunlung haduh ka jinglong samla lud bad ter ter.
U Myntri Rangbah u la pynpaw ba ha ki phra snem ba la leit, ka Meghalaya ka la kiew shibun shah ha ka jingpynbeit ïa ki jingeh kiba kongsan kum ka jingïap ki kmie ba kha khun, ka jingïap ki khunlung ba dang kha, ki jingduna ha ka jingai tika, ka jingduna ka jingioh jingbam tei met, bad ka heh ka san jong ki samla lud lyngba ki jingpyrshang kiba thymmai, kiba pynshong nongrim ha ki jingkheiñ, bad kiba ïalam da ki shnong.
U la ban jur ïa ka jingdonkam jong ka jingthoh jingtar, ka jingshim rai kat kum ki sakhi, bad ki rukom peit bniah da ki kor digital ban pyntikna ïa ki jingmih kiba lah ban thew, haba bynrap ba ka Meghalaya ka dang pynwandur ïa ka rukom pynroi kaba lah ban long ka nuksa ïa kiwei ki jylla kiba mad ïa ki jingeh kiba kumjuh.
U Myntri Rangbah u la khot ïa ka UNICEF ban dang ïai bteng ban kyrshan ïa ka Jylla lyngba ki technical expert, ka jingthoh jingtar ïa ki rukom treikam kiba bha tam, ka jingïasam jingtip, bad ki jingïatrei lang bad ki bor pynroi bad ki kynhun ba pyntrei ia ki CSR ban nang lah shuh shuh ha ka ban pynlong ia ki prokram kiba jop.
Ka UNICEF ka la pynskhem biang ïa ka jingkut jingmut ba kan dang ïai bteng ban ïatrei lang bad ka Sorkar Meghalaya ha ka jingpynkhlaiñ ïa ki rukom treikam ha ka liang ka koit ka khiah jong ki kmie bad ki khunlung, ki jingpynbiang ia ki jingbam tei met, ka jingpynrung lang ïa ki briew ba don jingduna ha ki dkhot met, ka jingpynkup bor ïa ki samla lud, bad ki kam pynroi kiba lamkhmat da ki shnong.
Ki heh Ophsar ka sorkar bad ki dkhot jong ka kynhun UNICEF ki la don lang ha ka jingïalang.
