Shillong, Jylliew 4: Ka Mahila Congress hynne ka sngi Palei kala ujor da ka ejahar ha Sadar Police Station pyrshah ia kawei ka YouTube Channel halor ka jingkynnoh ba kala pynthohbria ia u President ka MPCC bad u MP barim ka Shillong Bah Vincent H Pala, da kaba kynthoh da ki kyntien kiba tohmet.
Ka President jongka Meghalaya Pradesh Mahila Congress Committee (MPMCC) ka Kong Joplin Shylla ba ha katei ka jingujor la kdew ia ka kyrteng jong u Bah Ronnie Rani, uba pyniaid ia ka Channel Ka Jingshisha (‘The Truth’).
“U Bah Ronnie Rani, lyngba ka channel kaba la ai kyrteng Ka Jingshisha ne ‘The Truth’, kala pynthohbria ia u Bah Vincent H. Pala, u President bad u MP barim,” la ong ka Kong Shylla.
“Ula ai ia ki jingkynthoh kiba pynthohbria bad kiba tohmet, da kaba khot ia u da u Bseiñ bad Thliem. Ngi wan hangne ban ujor da ka ejahar”.
Da kaba pynpaw ia ka jingbitar halor katei ka Video, ka Kong Shylla kala ong, “Kum ka Meghalaya Pradesh Mahila Congress, ngi sngewpang ka mynsiem ia ka jingleh jong u Bah Ronnie Rani. Ngi lah iohi ia ka Video ha YouTube bad ngi lah kyndit halor ka jingkynthoh tohmet pyrshah ia ka Congress. Ym shim la sangeh tang hangne hynrei ula kynthoh ruh ia u Nongialam ba mynta u jong ngi bad ia kito ki bym don shuh bad ngi”.
Kala pyrshah jur ia ki kyntien kiba ula kren pyrshah ia u Bah Pala. “Ki kyntien kiba la pyndonkam kidei ki bym lah ban pdiang. Pyrshah ia u Bah Pala, u bym don eiei bad kitei ki mat, kila shu kynthoh khlem nongrim. Ula khot ia u da u Bseiñ bad Thliem. Kum ki Khasi, ngim ju pdiang ban kynthoh pohdor ia uno uno uba dei hi u jong ngi. Lada u don ka jingshun kaba shimet, u lah dei ban shimkhia hi dalade ym ban pyndonkam ha ka rynsan paitbah”.
“Ngi ngim ithuh ia u Bah Ronnie, hynrei u pyniaid ia kawei ka channel kaba la tip kum Ka Jingpynshai – The Truth. Ngi shem ba ka jingkynthoh ka jongu hynin ka sngi ha ka YouTube Channel ka long kaba hap ban pyrshah jur. Kumta ngi lah ujor da ka ejahar ha Sadar Police Station.”
U Legal Counsel u Bah Kynpham Kharlyngdoh ula pynpaw ia ka jingsngewkhia ha kaba iadei bad ka por ba la pynmih ia kine ki jingkynthoh.
“Ha ki por kumba ju long, kan long da kumwei pat, hynrei mynta kala dei ka por elekshon bad katto katne ki lah ban shimkabu” ong u Bah Kharlyngdoh.
“Ngi lah dep ujor pyrshah ia ka channel halor ka video kaba la ai kyrteng ‘Statement against Congress candidate Vincent H Pala byelection 26”. “Ngi lah ujor ia ka ejahar ha Sadar Police Station pyrshah ia ka channel bad ia ka YouTube video” ula bynrap.
“Ngi lah iakynduh ruh ia u SP ka East Khasi Hills Bah Vivek Syiem ban phah tuklar khnang ba ka ain kan iaid hala ka jong ka lynti. Ban khot iano iano da u Bseiñ ne u Thliem kadei kaei kaei kaba ym lah ban pdiang”.
U Bah Kharlyngdoh, ula ong ba katei ka video kadei kaba la kynthoh ia bun ngut ki nongialam. “Ha ka video, ula kynthoh pyrshah ia u Dr Mukul, Sanjay Das bad khamtam eh ia u Bah Pala ba pynjot ia ka seng Congress. Ula kren pyrshah ruh ia ka seng hi baroh kawei”.
