Shillong, Jylliew 04 : U Myntri ka DoNER Jyotiraditya M Scindia ha ka sngi Palei ula ong ba ka Ministry kala kylla long ka “nongpynbeit, nongpyniaid bad ka pyrnon na ka bynta ka roi ka par jong ka thain” da kaba treikam lyngbaki “Lai tylli ki C-Connect (pyniasoh), Converge (wanlam lang hajuh) bad Catalyse (nongpynurlong)”.
Haba kren ha ka jingialang 73rd NEC Plenary ba pyniaid da u Myntri kam Pohiing Amit Shah, u Scindia ula iathuh ba phra tylli ki High-Level Task Force kila aiti ia ki roadmap ne lynti treikam ba iadei bad ka jingkynshew kam, ka rep ka riang, ka kam jngohkai, ka kam ialehkai bad ki lad pyniasoh.
“Ki Task Force…..la thaw ban pynkhreh ia ka roadmap kaba bniah na ka bynta ka roi ka par hadien habud jong ka thain Shatei Lam Mihngi bad ban pynlah ia ka thain ba kan synniang shikatdei eh sha ka thong jong ka Viksit Bharat 2047” ula ong.
Ula bynrap ba “ia ki jingai jingmut jong ki Task Force yn sa aiti sha u Chairman ka NEC ba un nang pyrkhat shuh shuh bad ban pyntreikam” bad ki “High Level Steering Committee ba kynthup ia ki Myntri Rangbah ki Jylla bad ki Myntri Sorkar” kila tyrwa ban peitthuh bha ia ka jingpyntreikam ia ki kam.
Halor ka bei tyngka, u Scindia ula ong “Ka jingpynlut hapoh ka Ministry of DoNER kala kiew na ka T.1000 klur ha u 2022-23 sha jan T.4000 klur ha kine ki arsnem bala leit, katba ka Ministry kala ioh ia ka bhah mang tyngka ba T.6,500 klur na ka bynta une u snem mang tyngka”.
Haba pyntip ia ki jingiohnong na ki jingkynshew, ula ong “Ka Rising North East Investment Summit….kala lam sah ka jingkular ban kynshew kam ba kot kumba T.4.5 lak klur”.
“Ka jingkynshew ba shongdor kumba T.40,000 klur lah dep ban pyntrei naduh ba pynlong ia ka summit ha u bnai Jymmang 2025, kaba pyni ia ka jingkiew ha ka jingsngew shaniah ki nongkynshew kam ia ka thain” ula bynrap.
Halor ka banking, u Scindia ula ong “131 tylli ki shnat bank ba thymmai la dep ban pynkha ha kylleng ka thain Shatei Lam Mihngi ha kine ki 15 bnai balal leit, katba 6,500 tylli ki shnong ki bym pat ju iohi iaki bank, mynta la wanrah lang ia ki hapoh ka banking network”.
“Ka jingpyntreikam ia ka jingsiew digital ha ka thain kala kot jan 90% lyngba ka UPI” ula ong.
Halor ki kam jngohkai, ula ong ba ki Circuit ba pawnam la trei ha kylleng ki 8 tylli ki Jylla “ban pyni ia ka jingsiewspah ka thain ha ka jingdon ia ka mariang kaba itynnad, ka pateng deiriti, ki jingthaw ba im bad ka lah ban kyntiew ia ki kam jngohkai sha ki jaka bym pat ju poi briew”.
Ula ai nuksa ia ka “Matabari Tourism Circuit ha Tripura bad ka Sohra Tourism Circuit ha Meghalaya” kum ki project kiba kongsan ban kyntiew ia ka jingwan iuhkjat ki nongshangkai bad ban aikam aijam.
Hapoh ka One State One Product initiative, ula ong “Ka Sorkar Pdeng kala ithuh ia ki mar ba pynmih na ki Jylla kum u shynrai Lakadong na Meghalaya, Muga Silk na Assam, Kiwi na Arunachal Pradesh, Queen Pineapple na Tripura bad ka Organic Farming na Sikkim”.
“Da kaba pyndonkam bha ia ki jingkhlain ba kham pher jong kawei pa kawei ka Jylla, kane ka sienjam kan iarap ban pyn ioh ia ka jingithuh ka pyrthei iaki mar ba pynmih n aka thain haba wanrah ia ka roi ka par kaba kynthup lang ia baroh bad kaba iai neh” ula ong.
