Shillong Nailur 26: U Symbud Myntri Rangbah ka Jylla bad National Vice President ka NPP, u Bah Sniawbhalang Dhar ha ka sngi Thohdieng ula kyntait ia ka jingsaphriang ki khubor ba ki MLA ka NPP kila bud lang ban rung sha ka BJP hadien ba 8 ngut ki MLA ka UDP kila leit ban pyniasoh bad ka BJP bad ula ong ba baroh 33 ngut ki MLA ka NPP ki iatylli kawei bad ka sorkar MDA ruh ka dang skhem bha.
U Bah Sniawbhalang Dhar, uba dang shu wanphai na Delhi ryngkat bad u Myntri Rangbah u Conrad K Sangma bad u Symbud Myntri Rangbah u Bah Prestone Tynsong, ula ong ba ka jingleit Delhi kadei beit na ka bynta ki kam sorkar.
“Phi lah iohi ia ka jingsaphriang ki khubor hamsaia hynrei nga kwah ban pynshai ba kam don eiei kaba bakla hapoh ka longiing jongka NPP. Ngi long kiba ia tylli mlon, khamtam eh ma ngi ki 3 ngut ki nongialam – Conrad K Sangma, Prestone Tynsong bad Sniawbhalang Dhar – Ngi don beit da kawei ka jingmut” ula ong.
Ula kyntait ia ki khubor ba 22 ngut ki MLA ka NPP kila don ha Delhi ban iakynduh ia ki nongialam kiba hakhlieh jong ka BJP.
“Nga iohi hynin ka sngi, kila ong ba 22 ngut ki MLA ka NPP ki don ha Delhi. Nga ong ia phi, ki don tang 3 ngut ki MLA ha Delhi na ka bynta ki kam sorkar. Nga sngewsynei na ka bynta kito ki lad pathai khubor kiba pynmih ia kum kitei ki jingpynbna ha ki social media. Ki briew kin rkhie ia ki. Baroh 33 ngut ki MLA ka NPP ki skhem bad ki iatylli lang kawei. Kine ki jingkynnoh kidei ki bym don nongrim” ong u Bah Dhar.
La kan don ka jingktah ia ka sorkar MDA na ka jingleit pyniasoh ki MLA ka UDP sha ka BJP, u Bah Dhar ula ong, ba kan ym don jingktah eiei.
“Kane ka jingleit rung kadei hapdeng ki ar tylli ki seng sain pyrthei – BJP bad UDP. Kam dei ia nga ba ngan pynshai na ka bynta ka jongki. Kaei kaba nga kwah ban pyntip sha phi, ka long ba kam don kano kano ka kynrum kynram hapoh ka MDA. Ka jingkhlain bor ka MDA ka neh hi kumjuh. Kila kynthih na kawei ka seng sha kawei pat kaba don hi ha ka liang synshar. Man la ki seng ki kwah ban pynkhlain ialade bad kam don satia kano kano ka jingma ha ka” ula ong.
“Ngi lah pyniaid ia ka sorkar mynta la 8 snem shiteng. Naduh u snem 2018 haduh u 2023 ngi lah pyniaid tang da 19 ngut ki MLA bad mynta ngi lah don 33 ngut. Nga ai khublei kyrpang ia ki seng sain pyrthei kiba iatreilang, kiba dang iai kyrshan ia ngi” ula bynrap.
U Bah Dhar ula kyntait ruh ba kan don kano kano ka jingdawa na ka BJP ban bhah shuki myntri shuh shuh ia ki.
“Kam shim la don kano kano ka jingdawa na ka BJP ban kyntiew ia ka bhah shuki myntri na 1 sha ka 4. Baroh kin neh beit kumjuh” ula ong.
Haba kylli la ki paitbah ka Meghalaya kin pdiang ia ka BJP ha u snem 2028, u Bah Dhar ula ong, ka histori ka kdew da kumwei pat.
“Ka Meghalaya kadei ka Jylla Khristan bad ki briew ki tip kumno ban vote da ka jingstad. Ia 40-53 snem, ia ka BJP ym pat pdiang hapoh ka jylla Meghalaya. Nga tharai kan neh hi kumjuh. Ki lah ban leit pyniasoh tang shipor na ka bynta 1 snem shiteng, hynrei ki paitbah kin sa ai ia ka rai ha u snem 2028. Ngi kum ka NPP ngi long thikna ba ngin ioh palat ia ka 33 ha u snem 2028” ula ong.
