Itanagar, Risaw 27 :U Myntri Rangbahduh (PM) ka ri u Narendra Modi un wan ban plie ia ka kad liengsuin Donyi Polo Airport kaba hajan ka nongbah mynta ka taiew, ong ka khubor heh sorkar.
U PM Modi un wan poi ha Arunachal Pradesh ha ka 30 tarik mynta u bnai na ka bynta ban plie paidbah ia katei ka kad liengsuin ha Hollongi, kumba 15 kilomitar na ka nongbah Itanagar, ong ka tyllong khubor ka sorkar pdeng.
Na ka liang u Myntri Rangbah (CM) ka jylla u Pema Khandu dang shen ula iakynduh ia u PM Modi ha New Delhi bad kyrpad ia u na ka bynta ban wan plie ia kane ka kad liengsuin ha kane ka nongbah ka Arunachal Pradesh.
Watla katta u Modi un ym iadon bynta ha kaba iadei bad ka jingplie ia ka Kameng hydro electrict project kaba 600 MW ha ka thain West Kameng district ka jylla, ong ka tyllong khubor.
Ia kane ka kad liengsuin Donyi Polo Airport la pyntrei da ka Airport Authority of India (AAI) ha ka jinglut kaba kumba T.645 klur.Kane ka kad liengsuin kaba don ia ka madan kaba jyrngam ka don phra tylli ki jaka rung na ka bynta ki nongleit jingleit bad ka ban lah ruh ban pynbit pynbiang ia haduh kumba 200 ngut ki nongleit jingleit ha ki kynta kiba paidbah briew.
Ka jingpyrshang pynher ia ka liengsuin ka Indigo Airline kala long kaba seisoh hapoh kane ka kad liengsuin kaba dang shu dep tei shen ha ka 18 tarik mynta u bnai.
Kane ka liengsuin hadien ba la pyntreikam ia ka kan dei kaba nyngkong eh hapoh Arunachal ka ba don sha ka thain mihngi ba pajih tam jong ka ri, bad ka ban don ruh ha ka map ha kaba iadei bad ki kam pynher liengsuin jong ka ri.
Ka kad liengsuin Lilabari airport kaba jan tam sha ka nongbah ka jylla, ka don kumba 80 km ka jingjngai na Lakhimpur district ka Assam.
Kane ka kad liengsuin kaba thymmai ka don ia ka jaka iaid (runway) kaba 2,300 mitar ka jingjngai bad kaba la biang pura na ka bynta ban pynhiar bad pynher ia ki liengsuin kiba heh ne ki Boeing 747s.Namar ka jingdon ha ka jaka kaba heh kumba 4,100 sq mitar, yn pynbiang pynbiang ia kane ka jaka da baroh ki jingdonkam katkum kane ka juk kaba mynta na ka bynta ki nongleit nongwan, ong ki tyllong khubor.
Shuh shuh ka Kameng hydroelectric project ka dei kaba heh tam na kiba kum kine ki projek hapoh ka thain shatei lammihngi (Northeast) bad ka dei ruh kaba la pyntrei hi da ka North East Electric Power Corporation (NEEPCO) Ltd ka jylla ha ka jinglut kaba T.8,000 klur.
