Shillong, Risaw 15: U Symbud Myntri Rangbah ka Urban Affairs Bah Sniawbhalang Dhar ha ka sngi Balang, ula ong ba ia ki kam jong ka Polo Market Complex lah dep ban aiti bad shen yn sa sdang pyntyllun noh ia ka kam, katba ia ka MTC Mall ha Khyndailad kadei kaba la jam sha kaban pyndep pura noh shen.
Haba iakren bad ki nongthoh khubor, u Bah Dhar ula ong, ba u lah dep ban pyllait ia ka File ne ki kot ki sla kiba iadei bad ka Polo Market.
“Nga lah dep ban mynjur ia ka File bad ia ka kam ruh lah dep ban aiti. Lada kam don kano kano ka jingpynkylla, ki kam kin sa sdang noh shen” ula ong.
Halor ka MTC Shopping Complex ha Khyndailad, u Dhar ula ong, ba kaba sah mynta ban tei, kadei sa tang ki bynta kiba rit.
“Kila don tang katto katne ki kam kiba dang sah. Shisien ba lah dep ban shna lut ia baroh, ngin sa khot ia ka EOI,” ula ong bad ka bynrap ba ia kane ka kam la khmih lynti ban pyndep noh hapoh une u snem hi.
U Myntri ula ong, ba yn sa leit ban jurip khatduh hadien ba la dep ka elekshon shiteng samoi jong ka MP Lok Sabha.
“Hadien ka elekshon, ngan sa leit ban jurip na ka bynta ban pynbeit pura” ong u Bah Dhar.
