Agartala, Risaw 26 : Arngut ki samla kila ngat ha ka jingmynsaw jur na ka jingshah ther kuli ha ki kynhun runar hynnin ka miet sngi ba Ar hakhmat jong ka Sonargaon Dhaba kaba hap hapoh Airport Police Station.
Ia kine ki briew kiba la mynsaw la tip kyrteng kum u Sanjay Das bad u Haripada Das kiba dei na ki bynta jong ka thain Natun Nagar.
Katkum ki khubor la iathuh ba ki kynhun runar kila siat kumba lai haduh saw kuli lyngba ki pistol.
Hadien ba la ioh jingtip halor kane ka jingjia ki bor pulit ka Airport kila her bran bran sha katei ka jaka bad lapdien ruh ia katto katne ki snep kuli na katei ka jaka.Nalor kata kila iathuh ruh ba uwei u briew ula shah siat na ki bynta jong ka kjat bad uwei pat na ki bynta jong u syngkai.
Na ka liang u OC ka Airport police station bad West Police Station kila leit hi da lade sha katei ka jaka ba la jia katei ka jingshah thombor ha ryngkat u SDPO Sadar u Ajay Das.
Hadien la pynkit noh ia kitei kiba la mynsaw shapoh ka hospital na ka bynta ban aijingsumar.
Shwa jong katei ka jingjia na ka liang u OC ula ong ba kitei ki samla kiba la ngat ha ka jingmynsaw kila leit sha Sonargaon na ka bynta ban bam ja miet.Hynrei tang hadien ba kila mih na katei ka jaka kila shah siat ha ki runar.Na ka liang ki bor pulit kila rejistar case halor kane ka jingjia.
Katkum ki tyllong khubor pulit la ong ba halor katei ka jingjia shah ther kuli hakhmat ka Sonargaon Dhaba ha ka surok ka ban leit sha Airport la ioh ban kem noh ia arngut ki briew kiba la shah kynnoh donkti ia kiba la tip kyrteng kum u Prabhakar Ghosh (40) bad u Santosh Das (35 snem rta) kiba dei na Usha Bazaar.
