Shillong, Risaw 26 : Ki Nongri Dohkha ka Jylla kila wan ban pyni nam ia ki jait dohkha bapher bapher kaba ki pynmih na ki pung ba ki buh, ha ka State Aqua Fest ba hynriew bala pynlong da ka Tnad Fisheries ka Jylla hynne ka sngi Balang ha State Central Library, Shillong.
Ka Tnad kala pynieng ia ki stall bala pyniaid da ki Tnad bapher bapher ka Sorkar Jylla, ki Self Help Group, ki Seng Treimon Sngewbha, ki Nongri Dohkha bad ki nongsengkam lajong kiba la pyni nam bad die ia ki dohkha lem bad kiwei kiwei ki mar ba shna na ki dohkha.
Kane ka Aqua Fest ka dei kaba la pynlong da ka jingthmu ban pyni ia ki jingnang roi ka kam ri dohkha ha ka Jylla, Lyngba kane ka Fest, ka Sorkar Jylla kala pynshlur ban kyntiew ia ki nongsengkam ha ka kam ri dohkha.
U Chairman ka Meghalaya Farmers (Empowerment) Commission KN Kumar haba ai jingkren ula ong ba ka State Aqua Fest ka dei ka rynsan ha kaba ki nongthied nongpet bad ki nongdie kila iawanlang ha kajuh ka jaka bad ruh ka jaka ba ka Sorkar bad ki nongri dohkha ki wan hajuh ban nang pynkhlain ia ka jingiadei kam ha kaban pynlong ia ka Jylla Meghalaya kum ka jaka kaba lah ban pyndap nalade ia ka jingdonkam dohkha.
Ha kane ka Fest la pyni nam ia ki mar ba bun jait kiba la pynmih na ki dokha ba kynthup naduh ki kha syang, ki kha thad, bad ki ashar dohkha
Ki nongri dohkha na kylleng ka Jylla kila wan ban iashimbynta ha kane ka Fest ban iasam ia ki jingnang jingtip halor ka kam ri dohkha bad ruh ban die ia ki dohkha ba ki pynmih.
