Imphal, Risaw 26 : Ka party Congress ha Manipur kala dawa ba dei ban pynduh noh ia ka jinglong nongmihkhmat pyrshah ia ki san ngut ki MLA ka Janata Dal-United (JD-U) kiba la leit pyniasoh dang shen bad ka BJP.
Ka Congress Manipur kala phah ruh da ka jingujor sha ka Tribunal jong u Lamphang ka iingdorbar assembly ban dawa pynkut noh ia ka jinglong nongmihkhmat pyrshah ia kine ki san ngut ki MLA ka JD-U kiba la leit ban pyniasoh sha ka BJP ha une u bnai ba la dep.
Ia kane ka jingujor la ujor pyrshah da u vice president ka Manipur Congress u Hareshwar Goswami ia uba la synran lang da u muktiar u N Bupenda Meitei.
Lah ban kdew ba u Lamphang ka Manipur u Thokchom Satyabrata Singh ula pdiang ia kane ka jingwan pyniasoh jong kine ki san ngut ki MLA ka JD-U sha ka BJP hapoh ki kyndon jong ka 10th Schedule jong ka Constitution.
Kine ki san ngut ki MLA ka JD-U kiba la leit ban pyniasoh ia lade sha ka BJP ki kynthup ia u K Joykisan Singh (Thangmeiband), N Sanate (Tipaimukh), Md Achab Uddin (Jiribam), T Arunkumar (Wangkhei) bad u LM Khaute (Churachandpur).
Ha ka ilekshon assembly kaba la dep ha Manipur, ka JD-U kala jop hynriew tylli ki seat na ki 38 tylli kiba ka party kala pynieng kyrtong.
Khyndiat por hadien ba la pynbna ia ki nongjop ha kane ka ilekshon assembly, na ka liang ki MLA ka JD-U kila pynbna na ka bynta ka jingai jingkyrshan ia ka sorkar BJP ha Manipur.
Hynrei watla katta, kane ka jingleit pyniasoh jong kine ki san ngut ki MLA ka JD-U kala wan long khyndiat sngi hadien ba kane ka party kala pynkut noh ia ka jingiateh bad ka BJP hapoh Bihar na ka bynta ban thaw ia ka sorkar synrop kaba thymmai ha ryngkat ka RJD, Congress bad sawtylli kiwei pat ki party.
