Shillong, Risaw 25: U President ka Khun Hynniewtrep National Awakening Movement (KHNAM) youth wing bah Thomas Passah hynne ka sngi ba-ar, ula dawa naka sorkar jylla ba kan pynduh noh iaka interview thep kam sorkar haki Group B, C, D.
Haba kren sha ki lad pathai khobor u bah Thomas ula iathuh ba ka sorkar pdeng haki snem bala dep kala pynmih iaka hukum bala pynduh iaka interview thep kam sorkar ha ki Group B, C, D bad haduh mynta 25 tylli ki jylla hapoh ka ri India kila pyntreikam ia kane ka hukum hynrei ka Meghalaya kam pat lah ban pyntreikam.
“Ka hukum jong ka sorkar pdeng ka kren shai ba dei ban pynduh pyndam noh ban pynlong interview naka bynta ban thungkam sorkar ha Group B, C, D hynrei ka ba lyngoh ka long ha Meghalaya haduh mynta kane ka dang bteng” la ong u bah Passah.
U bah Passah ula ong “Ka jingdon ka Personal Interview ka pynduh jingkyrmen iaki samla ka jylla ban thep kam sorkar namar ki sheptieng ioh ki shah thok noh tang haka por Interview”.
Ula ong ba ki samla ka jylla ki ju kynnoh man ka por ba tang kiba ithuh briew kin shah jied haka por ba pynlong iaka Interview bad dei namar kane ka sorkar jylla kadei ban bud ryntih iaka jingbthah ka sorkar pdeng ban pynduh noh iaka Interview.
