Silchar, Risaw 25 : Ki nongkhaii tuh kila pyndonkam da ki buit treikam kiba thymmai hadien ba ki bor pulit kila pyrkhing tyngeh ban tehlakam ia ki kam khaii kwai beain napoh Myanmar da kaba pyndonkam ia ka Mizoram bad ka Assam kum ki lynti iaid, ong ka khubor pulit.
Katkum u heh pulit ha Cachar district shathie ka Assam la ong ba hadien ba la pynpoi beain ia u kwai sha Mizoram lyngba ki bynta khappud jong ka Champai hapoh Myanmar kine ki nongkhaii ki ju leit buh ha ki kudam bapher bapher kiba don ha ki bynta jong ka Vairengte.
Hadien kane ki ju shalan ia une u kwai shapoh Assam lyngba ki trok ha kine ki por ki snem kiba la leit noh.Kine ki nongkhaii beain kila pyndonkam ia kane ka buit mynta la slem bah.
Hynrei, hadien ka jingpyrkhing jong ki bor pulit hapoh Lailapur check post ha khappud ka Assam-Mizoram hapoh Cachar district, kine ki nongkhaii beain kila shim da kiwei pat ki sienjam kiba thymmai ban bteng ia kane ka kam khaii beain jong ki, ong u heh pulit.
Ula ong shuh shuh ba mynta kine ki nongkhaii beain kila pyndonkam da ki kali rit bad iaid lyngba kiba bun ki lynti shnong ban kiar na ka jingshah talasi ha ki pulit hapoh Lailapur check post.
Hapoh ki lynti shnong ka jingpahara jong ki pulit ka kham duna shibun bad kumta ruh kine ki nongkhaii beain kila shim kabu halor kane.
Nalor kata ka long ruh kaba suk ban kiar na ka jingsuba jong ki paidbah lyngba ka jingpyndonkam da ki kali rit na ka bynta ban leh ia kine ki kam khaii kwai beain.Nalor kata lada kine ki mar ki shah kurup noh ha ki pulit kam da don ka jingduh nong namar ka jingkit kalong kaba khyndiat.
Hadien ba kila jam lyngba ia ki jaka khappud jong ka Assam, ia kine ki kwai kila leit ban buh biang ha ki bynta jong ka shnong Umkiang ha Meghalaya.
Katkum ki tyllong khubor pulit, ki don shibun bah ki kudam kiba heh ia kiba la shna ha katei ka jaka.Hadien ba kila buh ia kine ki mar ha kine ki jaka buh hapoh ka shnong Umkiang, nangne ki ju pynkit da ki trok bad shalan sha ki bynta bapher bapher jong ka ri.
