Agartala, Risaw 25 :Ka seng Congress ha Tripura kala dawa kem mardor ia u khun jong u myntri ka BJP ha ka jylla halor ka jingkynnoh shah leh beijot kynhun jong kawei ka khynnah kaba dang 16 snem rta kaba la jia hapoh Unakoti district.
Kane ka jingjia la ong ba kala jia ha ka 19 tarik mynta u bnai ha ki bynta jong ka Kamarghar hapoh Unakoti district ka Tripura.
Katba ki bor pulit ka Tripura kila kem noh ia laingut ki briew, kaba kynthup ia kawei ka longkmie ha kaba iadei bad kane ka jingjia, hynrei katto katne ngut kiba la shah kynnoh donkti ki dang jah rngai haduh mynta.
Katei ka longkmie kaba la shah kem la ong ba kadei ka nongialam jong ka seng BJP women’s wing ha Tripura.
Na ka liang ka Congress ha Tripura kala kynnoh ba u khun jong u myntri ka BJP u Bhagaban Das ruh u dei uwei napdeng kiba la shah kynnoh donkti bad uba la don hapdeng ka jingphet rieh.
Katei ka khynnah la kynnoh ba kala shah leh beijot kynhun hapoh kawei ka iing lai mala hapoh Kumarghat, Tripura ha ka 19 tarik mynta u bnai.
“Ka kyrteng jong u khun u myntri sorkar kala paw pyrthei ha kaba iadei bad kane ka jingjia.Kumta, ngi dawa na u Myntri Rangbah (CM) Manik Saha ba un shimkhia halor kane ka jingjia.Ngi dawa ba dei ban kem mardor ia baroh kiba shah kynnoh donkti ha kane ka kam bymman,” ong u nongialam ka Congress ha Tripura u Asish Saha.
Ka seng Congress kala kynnoh ruh ba kala don ka jingpynkhreh na ka bynta ban pynkynriah noh ia utei u khun jong u myntri sorkar ka Tripura uba la shah kynnoh donkti ha kane ka kam leh beijot shapoh Delhi.
Ha kawei pat ka liang, ki party liang pyrshah ha Tripura, ka CPI-M, ka Congress bad ka Trinamool Congress (TMC) kila pynlong ka jingiakhih ban dawa iehnoh kam ia u myntri ka tnat labour uba dei ruh u nongialam ba la rim ka BJP u Bhagaban Das halor ka jingdonkti u khun jong u ha katei ka kam leh beijot.
Ka jingtohkit ka dang iaid shakhmat ba yn ym don ki ban lait lada lap ba ki donkti, ong u SP ka Unokoti district jong Tripura u Kanta Jangir.
Hynrei, watla katta na ka liang ka BJP kala kyntait ia kitei ki jingkynnoh da kaba ong ka dei tang ka kam iasyllad pyrshah ia u myntri ka Tripura u Bhagaban Das ban pynjah burom ia u bad ia ka sorkar ba la lamkhmat da ka BJP ha Tripura.
Na ka liang u nongaiktien jong ka BJP na Unokoti district u Debasish Sen u la ong : “Ha ka FIR kam shym la don satia ka kyrteng u khun jong u Das, bad uba la shah kynnoh donkti um shym la don satia ha Kumarghat mynta lah kumba shi taiew.”
