Shillong, Jylliew 20: U Myntri ka Tnad Arts & Culture ka Jylla Bah Sanbor Shullai hynne ka sngi nyngong ula pyntip ba ka Tnad Arts & Culture kan sa pynieng da u motdur ba shi rynieng jong u Khla Wait ka Ri-lum Jaiñtia-U Kiang Nongbah ha ka Mihmyntdu Junction kaba dei ka jaka jong ka Tnad Transport.
U Myntri u pyntip ruh ba hadien ka jingpynieng ia une u motdur, yn sa jer kyrteng ruh ia kane ka jaka da ka ‘U Kiang Nongbah Square’.
Ia kane ka rai la shim hadien ka jingialang bala pynlong bad ka kynhun jong ka Kiang Nongbah Iasiat Khnam Memorial Society (KNIKMS),ka Synjuk ki Waheh Chnong Jowai bad ka Jaiñtia Students Union (JSU).
U Bah Sanbor ula pyntip ruh b aula dep iakren bad u Myntri ka Tnad Transport bah Dasakhiat Lamare bad kyrpad ba un aiti ia kane ka jaka jong ka Tnad ha Mih Myntdu ban pynurlong ia kane ka kam.
“Nga la ai jingmut ia ka kynhun ka KNIKMS, JSU bad ka Synjuk ki Waheh Chnong ba kin phah da ka jingthoh sha u Myntri ka Tnad Transport bad Arts & Culture bad phah copy ruh sha u Deputy Commissioner khnang ban ngin lah ban leit jurip ia kane ka jaka bad ngin peit ba haduh katno ka jingheh jong ka jaka ba ngi donkam ban pynieng ia une u motdur ba shi ryngieng jong u Kiang Nongbah” ula ong.
Ha kane ka taiew bala lah,u Myntri ula leit ban jurip ia ka shnong Mihmyntdu hadien ka jingioh pdiang ia ka jing tyrwa na kine ki lai tylli ki Seng. I Principal ka Kiang Nongbah Govt College ruh ila iadonlang ha kane ka jingjurip.
“Ngi la ithuh ia kawei ka jaka ha Mihmyntdu kaba don ha National Highway ban leit sha Silchar ba ngin pynieng ia une u motdur bad ruh ban jer kyrteng kum ka U Kiang Nongah Square” ula ong.
Haba iadei bad ka jingpynieng ia u mordur ba shi rynieng jong ki lai ngut ki riew ialeh laitluid ka Jylla ba kynthup ia u Tirot Sing, u Kiang Nongbah bad Patogan Sangma ha Soso Tham Auditorium, u Bah Sanbor ula pyntip ba ula dep shong jingialang bad ki bahaiing jong kine ki laingut ki khla wait ka Jylla.
“Ngi la rai ban pdiang ia ka jingai jingmut jong ki bahaiing kata ba u motdur jong u Kiang Nongbah ka dei ban long kat kum ka dur ba mih ha ka Meghalaya Calendar, jong u Tirot Sing kat kum ka dur ba mih ha ka Stamp bad jong u Patogan Sangma ruh kan long kat kum ka dur ba mih ha ka Meghalaya Calendar” ula pyntip.
Halor ka jingtyrwa ban pynieng ia u motdur jong u Tirot Sing ha Dhaka, Bangladesh, u Myntri ula ong “Ngan sa phah biang ia ka shithi sha Dhaka bad ruh sha u Myntri korbar bar ri ka India ba kin ithuh noh ha kane ka jaka ba ngin pynieng ia u motdur”.
“Ki don artylli ki Cultural Complex jong ka Indian Embassy ha Dhaka-kawei kaba rim bad kawei kaba thymmai..ta ka daw ngi kwah ban pynthikna ia ka jaka ba hangno ngin buh ia une u motdur” ula ong.
U Bah Sanbor u ong ba hadien ka jingpynbeit khatduh ia kine ki kam baroh, un sa ialam ia ka kynhun kynthup ki bahaiing u Tirot Sing sha Dhaka ban peit ia kane ka jaka.
