New Delhi,Risaw 21: U Myntri ka Sorkar Pdeng uba khmih ia ki tnad kam pohiing bad Cooperation, u Amit Shah haba kren haka jingrakhe iaka ‘Police Commemoration Day’ ha National Police Memorial ha New Delhi, hynne ka sngi, ula pynpaw iaka jingsngewnguh ia ki pulit bad kynhun CAPF kiba la aiti ia la ka jingim.
Ha katei ka jingialang la iadonlang ki heh ki haiñ kiba kynthup ia u Myntri Khynnah ka tnat kam pohiing u Ajay Kumar Mishra, NishithPramanik bad u Union Home Secretary bad kiwei kiwei.
U Amit Shah u la ong, ba ka nongrim jong ki jingjop kiba bun ka long ka jingaiti ki pulit bad ki shipai iala ka jong ka jingim bad palat 35,000 ngut ki pulit bad ki shipai CAPF na kylleng ka ri ki la aiti ia la ka jingim ha ka jingiada ia ka jingshngain ha ka ri bad u pud u sam jong ka ri.
U la ong, ba kane ka jingaiti jong ki ban iada ia ka ri kin ym sepei bad ka India kan bteng ban kiewshaphrang ha ka roi ka par.
U Myntri ka tnat kam pohiing ula ong, ba ki kynhun pulit ha kylleng ka ri ki pyndep ia la ki kam wat hapdeng ki jingeh kiba bun ban pynthikna ka jingshngain hapoh ka ri bad dei namar kane ba ka ri mynta ka don ha ka lynti jong ka roi ka par.
Ula ong ba ki pulit ki trei ia ki kam bapher bapher kum ka jingialeh pyrshah ia ki lehnoh bad ruh ka jingtehlakam ia ki kam be-aiñ barit baria, ka jingpynthikna ia ka jinglait na ki jingkulmar ha ki jingialang bapher bapher bad ka jingpyllait im ia ki briew namar kidei kiba nyngkong kiba poi ha ki jaka haba don kano kano ka jingjia kaba sngewsih.
U Shah u la ong, ba dang shen, ka pyrthei baroh kawei ka la mad ia ka jingeh kaba khraw lyngba ka khlam COVID-19 bad ha ka jingiatreilang da ka ri baroh kawei hapoh ka jingialam jong u Myntri Rangbah Duh, u Narendra Modi, ki pulit ki la don ka bynta kaba khraw ha kane ka jingialeh pyrshah ia kane ka khlam khlem da pyrkhat ia la ka jong ka jingshngain.
U Amit Shah ula ong, hapoh ka jingialam jong u Myntri Rangbah Duh u Narendra Modi, kala don ka jingkylla kaba bha ha ka jingshngain ka ri ha kine ki snem ba la dep.
Ula ong, mynshuwa ki ju don ki jingkulmar man ka sngi ha ka thain shatei lam mihngi, ha Jammu & Kashmir bad ha ki jaka ba shah ktah ha ki kam lehnoh, hynrei ha kine ki 8 snem ba la dep, ha ka jaka jong ka Armed Forces Special Powers Act ha ka thain shatei lam mihngi, ki samla ha kane ka jaka kila ioh ia ka bor kaba kyrpang na ka bynta ka lawei kaba shai.
Ula ong ba ka jingduna palat 70% ki jingjia ki jingkulmar ha ka thain shatei lam mihngi ki dei ki dak jong ka jingriewspah jong ka thain bad wat ha Jammu and Kashmir ruh ki samla ki ju kawang maw hynrei mynta, kine kijuh ki samla ki don la ka bynta ha ka roi ka par jong ka Jammu and Kashmir ha ka rukom synshar paidbah.
U Shah u la ong ba ka Sorkar hapoh ka jingialam u Narendra Modi ka ieng skhem na ka bynta ka bha ka miat jong baroh ki pulit bad lyngba ka skhim Ayushman CAPF, ka Sorkar Pdeng kala sam kumba 35 lak tylli ki card bad haduh mynta la dep sam palat T.20 klur.
Ula ong ba lyngba ka jingiarap ka rynsan CAPF e-Awas, ka la suk ban sam ryntih ia ki Quarter ne ki jaka sah jong ki longing bad la dep ruh ban shna palat 31,000 tylli ki ïing, kumba 17,000 tylli ki ïing ki dei kiba dang shna bad sa palat 15,000 ki dei kiba dang ai jingmut ban shna, namar kane ka jingpynbiang ia ki ïing kaba ju long 37% ha u 2014 kan kiew noh sha ka 60%.
