Dimapur, Risaw 20 : Ka Seng jong ki riewtymmen ka Nagaland, ka Senior Citizens Association of Nagaland (SCAN) kala kynnoh ba ia ka Intangki National Park kaba don hapoh Peren district ka Nagaland kala don hapdeng ka jingshah kerkut bad shah pyniaid ha ka kynhun NSCN (IM).
Na ka liang ka tnat forest ka jylla ruh kala pdiang hakhmat ka kashari jong u chief information commissioner ka jylla ba kumba ka long mynta hi kim don bor shuh ha kaba iadei bad ka Intangki Reserved Forest, bad wat ki heh ophisar kila hap ban pan jingbit na ka NSCN (IM) na ka bynta ban ioh rung hapoh Intangki National Park, ong ka SCAN lyngba ka jingthoh.
Ka SCAN kala ong ba kala rah ia kane ka mat ha ka sien kaba nyngkong eh hapdeng jong ka snem 2019, kata hadien ba kila mih ki khubor hamsaia ba ki bor pyniaid jong ka tnat forest ha Intangki National Park kaba kynthup ia ki quarter jong ki staff ka department kila shah kurup bad shah pyniaid ha ka NSCN (IM).
Katei ka kynhun kala ong ba kala file da ka RTI ha ka 14 tarik u Rymphang 2020 lyngba u public information officer (PIO), governor secretariat ha Kohima.Ia kane ka RTI la pynphai biang sha u chief secretary ka Nagaland uba la phah ia ka sha u PIO ka tnat environment, forest and climate change, ong katei ka kynhun.
Ha ka 12 tarik u Risaw 2020, u director ka Intangki National Park ula shim ia ki sienjam ban kiar na kaba ai jubab ia katei ka jingpang RTI kaba la pynlong ia u chief information commissioner ba un shim ia ka sienjam ban khot markhmat ia ki heh ka tnat forest bad ia ka SCAN na ka bynta ka jingpynsngew kaba markhmat ha ka 7 tarik u Nailur 2022, na ka bynta ban bishar bniah halor kane ka jinglong jingman, ong katei ka jingthoh jong ka seng.
Ha kane ka jingialang pynsngew, ka tnat forest kala pynthikna ba ka NSCN (IM) kala pyniaid ia baroh ki kam ki jam kiba iadei bad katei ka park.
Ka SCAN kala ong ba hadien ka jingpynjari ia ka jingsangeh iasiat bad ka sorkar India, ka NSCN (IM) kala sdang ia ki kam pyni bor bad byrthen ia baroh ki nongtrei jong ka tnat forest kiba don hapoh Intangki National Park kaba la pynlong ia ki staff ba kin mih noh na ki quarter ki jong ki iwei hadien iwei napdeng ka jingsyier.
Ha ka jingpynsngew kaba la long ha ka 7 tarik u Nailur ba la dep, ka tnat forest kala pynshai ba hadien ba ki nongtrei jong ka tnat kila mih noh na ki quarter jong ki namar ka jingsyier, baroh kine ki jaka kiba la thyllai kila shah pyndonkam ha ka NSCN (IM) kat haduh mynta, ong katei ka seng.
Katkum ka tnat forest, ka sorkar jylla kala ioh ia ka jingpyntip ha kaba iadei bad ka jingshah lehbor jong ki nongtrei jong ka tnat khamtam kito ki ophis kiba don hapoh Intangki National Park ha ki dkhot jong ka NSCN (IM), hynrei na ka liang ka sorkar kam shym la shim ia ki sienjam ki ban lah ban pynsangeh ia kine ki kam lehnoh jong ka NSCN (IM), ong shuh shuh ka SCAN.
Shuh shuh kane ka kynhun seng kala kynnoh ia ka sorkar jylla hapoh ka jingialam jong u Neiphiu Rio halor ka jingiasylla kaba long pyrshah ia ka bha ka miat jong ki paidbah nongshong shnong ka Nagaland da kaba ailad ia ka NSCN (IM) ba kan kurup pura bad pyniaid ia ka Intangki National Park.
Nalor kata kala buh ruh ka jingkylli ia ki paid Naga ka jylla la ki hun mo ba kin shu sngap jar katba ka sorkar kaba kila jied kan die noh ia ki hok jong ki pateng ki ban wan jong ki bad ia ka lawei ka jong ki.
