Shillong, Risaw 20 : I kong Margaret Pathaw, I Nongiakhun Kti ba pawnam ka Jylla ila ioh ban khur ia ka takma ksiar ha ka jingiakhun kylla ba nyngkong ne first round (left category) jong ka 43rd World Arm-wrestling Championship in Turkey.
I Kong Margeret ila ioh ia kane ka takma ksiar ha ka jingiakop ba 60kg hynnin ka janmiet sngi Balang da kaba pynliem pyrshah ia ka Anna Santos jong ka Brazil.
Ha kane ka jingiakhun kylla ba nyngkong, arngut ki nongiakhun kti ka Jylla kila ioh artylli ki medal ha ka jingiakop iakhun kti ka diang. Kine ki long I Angel Merry Mylliem Umlong iba ioh ia ka takma tama bad u Alexander Lyngdoh uba ioh ia ka takma rynnong.
Ki 9 ngut ki nongiakhun kti ka Jylla ba mihkhmat ia ka Ri India sha Turker ki dei : Alan S Marbaniang, Kishore Chettri, Everson Thangkhiew, Angel Merry Mylliem Umlong, Airikymenlang Lyngdoh, Margaret Pathaw, Alexander Lyngdoh, Hubert Paliar bad Banshan Terang.
“Ka iapher bak ly bak haba ianujor ia kiei kiba long ha Jylla lane ha ka Ri jong ngi, ka rukom pyniaid ka long kaba paka bha, ki nongpyniaid, ka rynsan, ka bam..nadong hadong ki dei kiba biang bha” ong u Alan S Marbaniang haba iakren lyngba ka phone bad u nongthoh khubor.
“Haba nyngkong, ngi don ka jingkhuslai naba kiwei ki nongialehkai na kiwei ki Ri khamtam na ki Ri ka dewbah Asia ki kham biang ha ka met ka phad ban ia ngi ki Khasi…hynrei kane kam shym la buh ia ngi ha ka jingeh, ngi sngew sarong ba ngi la ioh lai tylli ki medal tang ha ka kylla ba nyngkong” ong u Alan.
U Alan u ban iakhun nyngkong eh mynta ka sngi ula pynpaw ia ka jingbym lah apshuh bad ula pynkhreh bha ialade ban iakynduh ia u nongiakhun pyrshah. “Nga la ju ong ia baroh ban ialehkai naduh ka mynsiem, ban jop ne rem kam don jingpher satia…hynrei kaei kaba kham kongsan ka dei ka jinghikai ba ngi ioh nangne. Nga, ba nga dei u nonghikai nga la ioh shibun ki jingmyntoi na kane ka lympung bad da kane ka jingnang jingtip, nga pyrshang ban ai jinghikai ia ki rang ba ki thei ialehkai hala iing”.
U Alan bad san ngut kiwei pat ba kynthup ia u Everson Thangkhiew, Angel Merry Mylliem Umlong, Margaret Pathaw, Alexander Lyngdoh bad Hubert Paliar kin iakhun biang mynta ka sngi.
