Nongstoiñ, Risaw 17: Ka seng Federation of Khasi Jaintia & Garo People (FKJGP) kala kynnoh ba ka sorkar Assam kala wan khroh mynta da ki kam pynroi sha ki shnong khappud ban pynthikna ba ki shnong kiba don hapdeng ka jingiakajia kin poi lut sha Assam.
“Ki don kumba 10 tylli ki Shnong kiba don ha ki thain Malangkona, ba ki briew ka Sorkar Assam ki ju leit barabor ban pynbiej bad kular da ki kam pynroi bapher bapher kynthup naduh ka jingpynioh bai bam ia ki khynnah skul bad kiwei kiwei” ong u Bah Jodish Dkhar President ka FKJGP-Langdongdai Area haba iakren bad u nongthoh khubor.
Une u Nongialam ka FKJGP ula ong baka jingiohlad jong ka sorkar Assam ka dei eh na ka jingleh kmienah jong ka Sorkar Jylla ia ki paidnah ka thain mynta la san phew tylli ki snem.
“Ka jingpynslem jong ka sorkar ban iapynbeit ia u pud u sam ba thikna, ka dei ka daw ba pynlong ia ka sorkar Assam ba kan shim kabu laiphew jait ia ki paidbah ha ki thain khappud” ula ong.
Kumjuh ruh, u la ong ruh ba ka jingdon jong ki katto katne ki riew shim kabu na ka bynta ban ïoh jingmyntoi shimet kiba ju kyrshan ïa ka sorkar Assam ha baroh ki liang, ka dei kawei pat ka daw kaba kongsan kaba pynlong ïa ki paidbah ba kin ïakynduh shibun ki jingeh.
Ka FKJGP ka kyntu jur ïa ka sorkar Meghalaya ba ka dei ban phai khmat bha sha ki paidbah kiba shong ha khappud, da kaba kan theh ïa ki kam pynroi ha kitei ki jaka, khnang ba ki paidbah kin sngew trai namar lada ka sorkar ka ñiew shilliang khmat kumba long haduh mynta, ka pynlong ia ki paidbah ban artatien bad sahdien.
Ha kajuh ka por, ka FKJGP kala kyntu ïa ki rangbah bad ki paidbah jong baroh ki shnong kiba don ha khappud, ba kim dei ban shah pynbiej ha kitei ki briew jong ka sorkar Assam ïoh ba kin babe kylla shisien ka sngi.
