Shillong, Nailur 29: Da kaba iada ia ka jingleh ia ka Special Intensive Revision (SIR) jong ka Electoral Roll ha Meghalaya, u Myntri Sorkar bad u nongialam ka BJP u Bah Sanbor Shullai ha ka sngi Baar ula ong, ba kane ka jingleh kadei kaba kongsan bha ban pynthikna ba ki mynder ri kin nym ioh ia ka hok ban thep vote bad ula kynnoh ia ka seng Congress ba kala pynsaphriang ia ki jingthok bad jingshukor tang ban pynsuki ia katei ka kam.
Haba kren halor ka jingkynnoh ka seng Congress pyrshah ia ka Election Commission of India (ECI), u Bah Shullai ula ong ba ka kyrwoh khubor kaba la pynmih hadien ba la dep pynlong ia ka jingialang kaba pura jong ka Commission, kala pynshai halor ki jingkynnoh jong ki seng kiba don ha ka liang pyrshah.
“Ka Joint Press Note jong ka Commission, kala pynshisha da kawei ka sur, ba ka Congress bad ki seng sain pyrthei kiba don ha ka I.N.D.I. alliance kila thok ban ialam bakla ia u paitbah ka ri ban pynmih ia ka jingsyier bad ban leh ia ki kam bym hok” ong u Bah Shullai ha ka kyrwoh.
Ula ong ba ka nongrim jong ka Congress kadei ruh kaba la pyni paitbah hapoh Meghalaya ruh, kaba ka jingleh ia ka SIR kadei kaba dang iaid shakhmat.
“Ka seng Congress kala ieng ha ka nongrim kaba la pyni paitbah wat hapoh ka jylla Meghalaya ruh, hapdeng jong ka jingleh ia ka SIR. Nga kyntu ia ki paitbah ba kim dei ban ngop ia kine ki jingkam kiba shukor jong ka Congress” ula ong.
U MLA ka BJP ula kdew ruh ba baroh 3 ngut ki Election Commissioner kila leh da ka jingiatreilang, kaba long pyrshah ia ka jingkam jong kiwei pat kiba don jingthud.
“Baroh 3 ngut ki Election Commissioner kila leh pura, lah rekod ia ka jingiamynjur lang ia man la ki rai kiba kongsan. Balei ka Congress ka pyrshang ban pynsaphriang ia ki khubor kiba thok? Ka SIR kadei ka sienjam kaba kongsan bha ban pynthikna ba ki briew kiba na kiwei pat ki ri kin um ioh ban thep vote ha ka jylla ka jong ngi” ula ong.
U Bah Shullai ula kdew ruh ia ka jingkyrshan jong ka jingbishar, da kaba ong, ba ka Statutory Declaration hapoh jongka Form-6 jong ka SIR kadei kaba la khmih bniah bha bad kadei ruh kaba la pynskhem da ka Supreme Court.
“Hato ka Congress bad ki paralok ki jongka ki buh jingkylli ia ka iingbishar kaba hakhlieh duh jong ka ri, ha ka kyrteng ban iada ia ka synshar paitbah? Ula buh jingkylli.
U Bah Shullai ula kynnoh ruh ba kala dei ka jingmlien jongka seng Congress ban kynthoh ia ki bor kiba bat ia ka riti synshar ka ri, haba ka mad ia kano kano ka jingrem ha ki elekshon.
“Tang namar ban ioh jingmyntoi mardor ha ka kam sain pyrthei, ka Congress ka ju mlien ban leh da kaba kynthoh ia ka Election Commission, ki iingbishar bad ia kiwei pat ki bor kiba trei laitluid. Ki lah buh jingkylli halor ki EVM haba ki rem ha ki elekshon, kane kadei kaba la jia bha ha kine ki sngi. Kila buh jingkylli ruh ia ki kam kiba iadei bad ka jingiada ia ka ri, ki bor iada bad mynta ia u National Security Advisor” ula ong.
“Lada kane kan bteng kan long kaba buh jingma bha ia ka jylla ka jong ngi. Nga kyntu ia baroh ba kim dei ban ngop ha kum kitei ki buit sniew” ula bynrap.
U Bah Shullai ula ong shuh shuh, ba ki paitbah ka Meghalaya kila kyntait ia ka seng Congress bad ia ki paralok ki jongka.
“Kidei kiba la shah kyntait ha ka jylla ka jong ngi bad mynta ki pyrshang ban ioh ia ka jingkyrshan u paitbah da kaba pynsaphriang ia kiei kiei kiba shu thok bad ban wanrah ia ka kynrum kynram. Man la ki kyntien kiba la kren da ka Congress ka pyni ia ka jingbym hok bad ka jingpyrshang ban pynthud ia ka imlang sahlang. Ki paitbah ka Meghalaya kin ieng bad ka jingshisha bad ym bad ki mat kiba shu thok ne jler” ula ong.
