Shillong, Nailur 29 : Ki kol ha ki minit ba sdang jong baroh artylli ki kylla ialehkai, kala pynlong ia ka Mawlai SC ban jop da 2-0 kol pyrshah ia ka MLP FT da 2-0, ha ka Shillong Premier League 2026, ba la long hynne ka nohphai sngi ha SSA Stadium.
Ia kine ki artylli ki kol ka Mawlai SC, la thep da u Arkibor Makhroh (3’) bad u Damanbhalang Chyne (51’), bad da kane ka jingjop, ka Mawlai kala kiew sha ka kyrdan kaba ar ha ka miej iakhein point bad buh ialade ha ka thong ban iaknieh ia ka nam kum ka lahduh.
Da kane ka jingjop ba mynta ka sngi ka Mawlai SC ka la khur 15 point, bad duna shi point ia ka Langsning FC, ka kynhun kaba don ha ka kyrdan kaba lai dei ka Shillong Lajong FC kaba la khur 14 point bad ka Nongkeh SSCC ka don ha ka kyrdan ba saw hadien ba ka la khur 13 point.
Katba ka MLP FT, ka jingshah rem ba mynta ka sngi kan pynlong ia ka kynhun ba kan iai neh ha ka kyrdan kaba san hadien ba ka la ioh ba kan khur 10 point bad ba ka la don shabar ka thong ban iaknieh ban ioh rah ia ka nam lahduh.
Ka MLP kan iakhun mynta ban neh hapoh ka kyrdan top 6 ka ban plie lad ba kan ioh jam pat sha ka lympung ialehkai jong ka SSA Super Cup.
Ka kol ba nyngkong ka Mawlai ka la ioh ba kan thep ka dei lyngba ka corner, kaba hangne u Arkibor u la ioh ia ka kabu kaba paka ban pynpar ia ka bol sha lyndet jong ka kol.
Ha kane ka jingiakhun, ki player ka Mawlai SC ki ialeh kloi lan ban pynsted ia ka rukom ialehkai, kaba lehse ka dei kawei na ki buit pynialehkai kaba lah ban iohi bad shem khah khah bha na u coach ka kynhun u bah Hering Shangpliang, katno tam lei lei ba kum ka kynhun ka don ia ki khynnah ialehkai kum u Verjelous Shylla bad Lovingstar Suting kiba dang smat dang sting bha ka met bad ba dang lah ban mareh sharum shaneng, kaba da kylla ka la bam bha ka buit ka bor ialehkai jong ki player ka MLP FT kiba bun na ki, kidei kiba la heh bad iaw bha ka rta ialehkai ka jong ki.
Hadien ba la ioh ban thep ia kane ka shi kol, ki rang ialehkai ka Mawlai ki iai bteng ban pynsted beit ia ka rukom ialehkai ka jong ki bad ban pyrshang pynkhih biang ia ka jar, kaba hangne mih paw ka jingpyrshang na u Jestibor Mawlong.
Na ka liang ki rang ialehkai ka MLP FT ki la ialeh katba lah ban pynsted ia la ka rukom ialehkai, hynrei ka bor met ka jong ki kam shim la ailad shuh ia ki namar katba kin da lah ban pynpoi shakhmat ia ka bol, ki rang ialehkai dien ka Mawlai ki la lap ban beh lypa ban pynkhlain ia la ka kut ialehkai ka jong ki.
Ha ka minit ba 45 u Damanbhalang u la tur shakhmat ban shut ia ka freekick ha kab aka bol ka la sam lyngba ka ka kynroh briew ba la ieng d aki player ka MLP FT bad u Basuklang u la hap ban pynsting ia ka met ban rynsied sha ka liang ba la her ka bol bad ban kyrda ia ka.
Wat la katta ruh la don teng ki khep, ba ki rang ka MLP FT, I kumba kin wanphai sha ka thong jong ka jingiakhun khamtam lei lei ha ki saw minit ba la pynjlan ia ka por iakhun ka kylla step.
Haba wan ban bteng ia ka kylla miet, sa shisien pat ka Mawlai SC ka la ioh ba kan thep pat sa ia ka kol kaba ar, kaba hangne u Daman u la rah sha kut ka box ia ka bol da kaba sam lyngba ia u BikramChetri bad ha ka por ba biang bha dain u khyrwit jam bha ia ka bol kaba la her nalor u Basuklang, bad katba un da lah ban kyrda ia ka , ka bol kluk ka la lap ba rung beit sha ka kol.
Kaba sngew tynnad ban tip hangne ka long ba tad haduh ba kut ka jingiakhun, ka Mawlai SC ka dang shah thep tang shi kol ha kane ka samoi ialehkai kaba mynta, namar ka jinglah ban ieng bad ap kol bha da u Lambhamiki Lamare.
Ka Mawlai kan jin a la dei ba kan jop kham bun kol ha kane ka kynti iakhun ia kaba ki kabu ksiar ba ki la ioh da ki player ki jong ka, kim shim la lah ban pynurlong pat sha ki kol.
Lashai ka sngi, ka jingiakhun kan long ka Rangdajied United FC pyrshah ia ka Mylliem SC ban long ha ka por 3 baje nohphai sngi.
