Shillong, Risaw 17 : Ki riew paidbah na kylleng ki jaka kila suba jur ba ka Food Corporation of India (FCI) kala pyniaid iew ia u khaw plastic da kaba khleh lang ia une u khaw bad u khaw rashon ban sam sha ki paid nongshongshnong ka Jylla.
Kane ka jingsuba kala mih na kylleng ki District ka Ri-lum Khasi bad Jaintia hadien ka jing ioh ia u khaw na ki Fair Price Shop ba iakhleh lang bad u khaw uba pher bad uba kem ding bad iingkhong.
Katto katne ki nongbam khaw rashon kila pyni nuksa ruh da kaba jied kyrpang ia une u khaw plastic na u khaw rashon ba ki ioh na ki Fair Price Shop (FPS) bad sa thang ia u daka ding, ha kaba la sakhi ba une u khaw ula ing bad kem ding kumba thang ia ka plastic.
“Ngi sngewkmen ba ngi ioh ia u khaw rashon uba bha bad uba tad bala ai da ka sorkar, hynrei khlem poi pyrkhat pat ba la ai sha ngi da u khaw ba khleh. La pynbam ia ngi da u khaw plastic uba lah ban buh jingma ia ka koit ka khiah jong ngi” ong kiba bun ki nongbam khaw rashon kiba iakynduh ba u nongthoh khubor.
Kat kum ka jingong jong ki, “Ngi hap pynlut por ban jied khaw mynta ym shuh tang ban jied ia u kba ne u pyrsit ne ia u khniang khaw hynrei kaba bun ka por ka lut ha ka jingjied ia u khaw plastic. Na ka shi tin rit (tin dud) u khaw rashon ngin ioh jan kot shikham u khaw plastic”.
Haba kylli kumno ba ki ithuh ia u khaw plastic, kine ki nongbam khaw rashon kila ong “Tang mar syn peh ia u khaw phin sa iohi kumno ba u lang shi jaka bad u iasyriem kum u muri la ka phyrnai khamtam haba buh ha ki jaka ba shat jingshai”.
Ka Shlem haba tohkit ia kane ka jingjia na ki nongsam khaw rashon ne ki FPS, kila pynpaw ia ka jingbym tip eiei halor kane ka jingkhleh ia u khaw rashon bad u khaw plastic bad ki ong ruh ba u khaw ba ki sam sha ki paidbah u dei uba ki leit sei hi na kudam jong ka FCI.
Kane ka jingioh bam ia u khaw rashon ba khleh khaw plastic kala jia ha baroh ki shnong ka Mawlai, ka thain Ri-Bhoi, West Khasi Hills, Eastern West Khasi Hills bad kumjuh ruh ha Jaintia Hills District.
Ki paidbah kila buh jingkylli ia ka Tnad Food & Civil Supply ka Jylla bad ia ki Ophisar jong ka Tnad kiba don ha ki District, ba kumno ki khlem leit peitthuh ne bishar ia u khaw na kudam ka FCI hashuwa ba kin ai jingbit ba u long uba bit ban sam sha ki paidbah.
Ha ka jingwad jingtip na ki bor Sorkar, kila pyntip ba une u khaw um dei satia u khaw plastic hynrei udei u khaw bala khleh bad ki vitamin bad ki nutrients bala tip kum ki fortified rice, uba la sam da ka FCI ha ka ri baroh kawei.
Haba kylli, kila pyntip ba ia une u khaw la pyndonkam ruh mynta haba ka shet ja sngi ia ki khynnah ne ka mid day meal hapoh ka Jylla.
Haba kylli halor ka jing ing bad kem ding sted bha, kila pyntip ba ia une u khaw la shna hi na u khaw bala tylliat kum u powder bad sa khleh ia ki vitamin bad ki nutrients bad hadien la pynwandur biang kum u khaw.
“Ka jingkem ding ne jinging ka dei namar ba une u khaw u dei uba la khleh bad kine ki jingkhleh kiban tei ia ka met” kila ong haba kyntu ia ki paidbah ba kim dei ban artatien ia une u khaw bala sam da ka Sorkar.
