Shillong, Risaw 17: Ki nongtrei jong ka Meghalaya Electricity Corporation Limited (MeECL) hapoh ka lama jongka MeECL Progressive Workers Union (MePWU) kila ai por lai taiew ban thaw iaka polisi treikam ban ithuh noh iaki kum ki nongtrei ba pura.
Katei ka jingdawa kala mih ha ka jingiashong jingialang hapdeng ka MePWU bad u chairman cum managing director (CMD) ka MeECL kaba la long hynne ka sngi.
Ka MePWU kala dawa ba dei ban ithuh iaki nongtrei Casual kiba la trei slem kum ki nongtrei ba pura bad ban pyllait noh iaki Arrear ba dang sah.
U President ka MePWU bah Mantiphrang Kiri Lyngdoh ula ong ba ka Union kala ai por haduh ka 10 tarik u Naiwieng iaka MeECL bad iaka sorkar jylla ba kin thaw daka polisi ban ithuh noh iaki nongtrei casual bala trei slem kum ki nongtrei ba pura lym kumta kin pep trei da kaba shim iaka Casual Leave bad kin pynlong da ka jingiaid paidbah.
U bah Mantiphrang ula ong ba ka jingialang bad u CMD ka long ka ba seisoh hynrei ka Union kala kren shai ba ka MeECL bad ka sorkar ki dei ban thaw beit iaka polici naka bynta ban ithuh noh iaki nongtrei contract/ casual kum ki nongrei ba pura ka tnat bording khamtam kito kiba la trei bun phew ki snem.
“Ka MePWU kan ap haduh 10 tarik Naiwieng iaka MeECL bad iaka sorkar jylla bad lada kane ka mat jingdawa kam urlong, ka MePWU kan pynlong daka jingpep trei (Casual Leave) naduh 10 tarik bad kan pynlong ruh ka jingiakhih daka ba iaid paidbah shaduh Secretariat” ong u bah Mantiphrang.
