Shillong, Naiwieng 12: Kala sdang daka ba iaid paidbah bad lam sha ka jingiapynibor bad mynta pat shaka jingshah pynkynriah noh iaki iaki dkhot ka Joint Action Committee bad Green Tech Foundation da ki bor District bad Pulit kiba la kit noh ia ki da artylli ki Bos na Main Gate Secretariat sha u Mot Kiang Nangnah hajan Civil hospital.
Kane ka jingshah pynkynriah noh iaki nongiakhih pyrshah iaka Shillong Ropeway Project na khyrdop Secretariat kadei hadien ba ki bor District kila pynbna ba ka long beain ban ialum ha kane ka jaka.
Ïa ki nongïalam bad ki nongkyrshan jong ka JAC la kit noh da ar tylli ki bos hadien ba ki la kyntait ban ia pra na khyrdop Secretariat wat hapdeng ka jingkyrpad bunsien daki Magistrate.
Shuwa ba kin shah pynkynriah, ka Magistrate kala pynbna lyngba ka PA system ba katei ka jingialang ka long kaba be-aiñ.
“Ka jingbit ba la ai da ka bor synshar district, ha ka point number 7, ka la kdew ba ym dei ban don kano kano ka jingsangeh ne pynlong jingiakhih daka ba shong kyllain mungor ha kano kano ka jaka jong ka jingïaid paidbah. Ka por ban pynlong ïa ka jingïaid paidbah ruh la buh ar kynta bad ka la palat ïa kajuh” la ong ka Magistrate.
Hashuwa kane ka JAC ka la iaid paidbah naduh u mot Kiang Nangbah haduh Secretariat ban pynbor iaka Sorkar ban pyndam noh ia ka Shillong Ropeway Project lane ban pynkynriah noh shawei pat.
Mar ïa poi ha Secretariat, ki nongïakhih ki la pyrshang ban pynpra ïa ki jingker kiba la buh pyrshah ïa ka khyrdop Secretariat.
Ki pulit ki la pynpulom noh bad kila kawang noh tyngsok bad ki nongiakhih kila thmu ban siang ban shong ha Madan bad kane kala wanrah ka jingiatai nai kaba jur hapdeng ar mamla.
Kane ka jingïakynad ka la jia hadien shisngi ba ka JAC ka la kyntait ïa ka jingtyrwa jong ka South Shillong Advisory Committee ban thaw ïa ka komiti riew shemphang ba laitluid ban wad bniah ïa ka jingktah jong ka ropeway ïa ka mariang, ka jingtyrwa kaba la ïakren ha ka jingïalang ba la pynïaid da u Myntri Rangbah ka kynhun sorkar bad u MLA ka South Shillong u Sanbor Shullai ha ka ïing dorbar bah jong ka jylla ha ka sngi thohdieng.
Ha kane ka jingiaid paidbah, ki longkmie ki long kiba ha khmat eh, ha kaba ki la rah ia ki placard kiba dawa ban weng noh mardor ia ki hynniew ngut ki Rangbah Shnong bad ban tar noh iaka jingiasoi ba ai wai iaka jaka bad ka tnat Tourism.
Ka khubor jong ki ka long ba ka kam jngohkai pyrthei ka lah ban leit shawei hynrei ki tyllong um kidei ban neh haka thain Laban.
Haba kren sha ki lad pathai khubor ha kane ka jingiaid paidbah, ka president jong ka JAC ka Deborah Marbaniang ka la ong, “Ngi khmih lynti ba ka Sorkar kan sngap ia ka jingud jong ki longkmie kiba iam naka bynta u Lum Shyllong, namar u Lum Shyllong um dei tang jong ngi, u dei jong baroh ka sor Shillong, jong ki Myntri Sorkar, jong u MLA ka South Shillong. Hynrei namar ba kane ka ropeway ka dei shaphang ka jingkwah brai ban ioh percentage na ka ropeway, ki tieng ban pyndam ia kane ka projek”.
“Ngin ap hangne namar ngi donkam ia ka sorkar, dei ma ngi kiba thep vote ia ka sorkar, ka sorkar kaba dei ban sngap ia ka jingud bad jingkyrpad jong ki paidbah” ka la ong.
“Lada ka sorkar kam khot ia ngi, ngin shong hangne, kam dei ba kim shym la khot ia ngi, ki la khot lai sien, ha ka sien kaba saw u MLA u la khot hynrei lada ka Sorkar kam sngap bad ka leh shiliang, te ngi ruh ngin sah beit hangne”, ka la bynrap.
Wat hadien bala kit daka bos bad leit buh biang iaki sha u Mot Kiang Nangbah, ka President jong ka JAC kala ong “Ngin ym phai dien bad ngin ieng skhem. Ka JAC kan ieng skhem haduh kaba kut. Ngin kyrpad ia ka sorkar ba kan weng noh ia kane ka projek lane pynkynriah noh sha kiwei ki jaka. Kata ka mut ka jingiakhih kan kut noh. Ngin iai bteng ban iakhih.”
