“U dei u nongsaid ain, ym u gunda” : Iada u Bah Sanbor ia u briew ba kynthoh ka JAC | Pynthikna ba la ujor ejahar

Shillong, Naiwieng 12: U Myntri Sorkar bad MLA ka South Shillong Bah Sanbor Shullai hynne ka sngi Palei ula ong, ba lah ujor ia ka ejahar ha Laban Police Station halor ka jingjia ha ka sngi Balang ha ka jingialang halor ka Ropeway bad ula iada tyngeh ia u briew ia kaba ka Joint Action Committee kala kynnoh ba udei u “Gunda.”

U Bah Shullai ula iathuh ba ia kane ka ejahar la mudui da u Pynhun uba dei u dkhot, hadien ba ki dkhot ka JAC kila kynnoh ia u da u “Gunda”.

“Kila kynnoh ba udei u Gunda, hynrei um dei satia,” ong u Bah Shullai.

“Haba ki ong Gunda ka mut ki hap ban pynshisha la u dei ne em uba don rekod ha ki pulit. Hynrei um dei shisha. Udei u nongiasaid ain” ula ong.

U Bah Shullai ula kyntait ruh ia ka jingkam ka JAC ba utei u briew udei u Personal Security Officer.

“Kila kynnoh ruh ba udei u PSO jong nga, kadei kaba bakla bad ka bym don nongrim. Hynrei udei u nongiasaid ain” ula ong.

Ula pynthikna ba katei ka ejahar kadei pyrshah ia ka JAC.