Shillong, Naiwieng 11 : Ka jingialang ba lum da u MLA ka South Shillong bad Myntri Sorkar Bah Sanbor Shullai, ban iakren halor ka Shillong Ropeway Project ha Madan Laban, kala pulom bad khlem poi shano shano ruh hadien ba ki dkhot ka Joint Action Committee (JAC) kila kyntait ia ka jingtyrwa ban thaw da ka Expert Committee ka ban bishar halor ka jingsngewkhia ia ka jingshah ktah ka mariang bad ieng skhem ha ka jingdawa ban pynduh ne pynkynriah noh shawei ia ka project.
Ia kane ka jingialang la pynlong ha State Convention Centre bad ki kynhun ba wan iashimbynta ki kynthup ia ki Nongialam jong ki Dorbar Shnong, ki Seng Kynthei, ki Seng Samla bad kiwei kiwei ki kynhun kiba don hapoh ka South Shillong Constituency ryngkat ki dkhot ka JAC ba pyrshah ia ka Ropeway project.
U Bah Sanbor ula buh ia ka jingtyrwa hapoh ka jingialang ban ialam ia ka kynhun ha ka ban iakynduh ia u Myntri Rangbah ka Jylla, ban buh ia ka jingtyrwa ia ka Sorkar ba kan thung ia ka Expert Committee ka ban bishar halor ka jingkam ba kan don ka jingktah ia ka mariang namar kane ka project.
Hynrei ki dkhot ka JAC kila pyrshah ia kane ka jingtyrwa bad namar ba ka jingiakren kam shym la poi shano shano ruh, u Bah Sanbor ula pynwai noh ia ka jingialang bad pyntip ba un ieh beit noh ha ka Sorkar ba kan shim ia ka rai.
Dei haba u Bah Sanbor ula rai ban mih noh na katei ka jingialang, kila don katto katne ngut ki briew kiba pyrshang ban bat bad ban kerkut ia u Bah Sanbor ha State Convention Centre, hynrei ki Pulit bad ki nongkyrshan u Bah Sanbor kila ieng ban iada bad ialam ia u Bah Sanbor sha kali ryngkat ka jingkyntu ba un mih noh na kane ka jaka ioh mih kano kano ka jingjia.
Ki dkhot ka JAC kila kynnoh ba u Bah Sanbor ula pyni ia ka jingbym lah ban leh eiei halor kane ka kam namar ba um shym la kren ia ka sur u paidbah haba dawa ruh ba u dei ban hiar shuki noh. Ka JAC kala ieng skhem halor ka jingdawa ba dei ban pynduh ne pynkynriah noh ia ka project sha kawei ka jaka.
Ka Nongialam ka JAC Kong Angela Rngad kala kynnoh ba u Bah Sanbor ula pynwai noh ia ka jingialang hadien ba ula dep ban pynsngew ia ka jingthmu jong ka sorkar bad ula ailad tang ia 2 ngut ki kynthei ban kren ha ka jingialang hashuwa ba un mih noh, kaba la pynbitar lep ia ki dkhot ka JAC.
“U Bah Sanbor hapoh ka jingialang ula wanrah ia ka jingai jingmut ban tyrwa sha ka Sorkar ba kan thung da ka Expert Committee….. ngim donkam Expert Committee shuh. Sa kawei ruh u dei u nongmiohkhmat paitbah, ka kamram jongu ka dei ban pynsngew ia kaei kaba ki paitbah ki dawa ym ban wanlam ia ka khubor na ka Sorkar, namar lah kata sngi, ulah dei ban sngewthuh ia ka jingangnud jong ki paitbah” kala ong.
“Ka kamram jong u nongmihkhmat ka dei ban iasaid ban leit pynsngew ia ka jingsngew jong ki paitbah, kata kadei kaba la pynkup bor da ka riti synshar ka ri. Hynrei u Bah Sanbor ula wanlam da ka kot ban pule, tip kaba la thoh da mano, bad ka JAC ka kyntait ia kata bad ka JAC kam pdiang ia kato ka kot kaba la pule ha ka jingialang” ong ka Kong Angela.
Ka Kong Angela kala ong, ba ka jingthmu ban khot ia kane ka jingialang ka long ban pynbor ia ki nongshong shnong ka South Shillong ban pdiang ia ka project.
